काठमाडौं । राहदानी विभागले राहदानी आवेदन फाराममा उल्लेख गरिएको मिति र समयमा मात्र विभागमा उपस्थित हुन सेवाग्राहीलाई आग्रह गरेको छ।

विभागले सोमबार सूचना जारी गर्दै सेवा लिन आउने सेवाग्राहीलाई तोकिएको समयको पालना गर्न आग्रह गरेको हो।

‘राहदानी आवेदन फाराममा उल्लेख गरिएको मिति र समयमा मात्र उपस्थित भइदिनुहुन अनुरोध छ,’ विभागले जारी गरेको सूचनामा भनिएको छ।

त्रिपुरेश्वरस्थित राहदानी विभागमा पछिल्लो समय सेवाग्राहीको अत्यधिक भीड बढेको छ। राहदानी बनाउन दैनिक ठूलो संख्यामा आवेदन पर्न थालेपछि विभाग परिसरमा सेवाग्राहीको चाप बढेको हो।

बढ्दो भीडका कारण सेवा प्रवाहमा समेत असहजता उत्पन्न हुन सक्ने भएकाले विभागले सेवाग्राहीलाई आवेदन फाराममा तोकिएको मिति र समयमै उपस्थित हुन आग्रह गरेको जनाएको छ।

विभागले अनावश्यक भीड कम गरी सेवा प्रवाहलाई व्यवस्थित र सहज बनाउन सेवाग्राहीको सहयोग आवश्यक रहेको जनाएको छ।

Originally published on abcnews.com.np.