काठमाडौं। सुनसरीको देवानगञ्ज गाउँपालिका–३, कप्तानगञ्जमा साउन १० गते भएको घटनामा मृत्यु भएका रवीन्द्रकुमार मेहताको परिवार र सरकारबीच सात बुँदे सहमति भएको छ।

गृहमन्त्री सुधन गुरुङ र मृतक मेहताका अभिभावकबीच सोमबार भएको छलफलमा सहमति जुटेको गृह मन्त्रालयले जनाएको छ।

सहमति अनुसार सरकारले मेहतालाई सहिद घोषणा गर्ने प्रक्रिया तत्काल अघि बढाउने भएको छ। साथै, साउन १० गते राति कप्तानगञ्जमा भएको घटनाको निष्पक्ष र प्रभावकारी छानबिन गरी दोषी देखिएकामाथि प्रचलित कानुनअनुसार आवश्यक कारबाही अघि बढाउने सहमति भएको छ।

सरकारले देवानगञ्ज–३ स्थित मदरसाको कानुनी हैसियत तथा त्यससँग सम्बन्धित विषयमा आवश्यक छानबिन तत्काल सुरु गर्ने भएको छ।

मृतक मेहताको परिवारका एक जना योग्य सदस्यलाई रोजगारी उपलब्ध गराउन आवश्यक पहल गर्ने प्रतिबद्धता पनि सरकारले जनाएको छ।

घटनाको अध्ययन तथा छानबिन गर्न गठित समितिले पेस गर्ने प्रतिवेदनमा समेटिएका सुझाव तथा सिफारिसलाई प्रचलित कानुनबमोजिम कार्यान्वयन गर्न आवश्यक प्रक्रिया अघि बढाउने सहमति भएको छ।

यसले घटनाको वास्तविकता सार्वजनिक गर्नुका साथै दोषी पहिचान र कारबाहीको प्रक्रियालाई अघि बढाउने बाटो खुल्ने अपेक्षा गरिएको छ।

सरकारले मृतक मेहताको शव नेपाली सेनाको हेलिकप्टरमार्फत देवानगञ्ज गाउँपालिका–३, सुनसरी लैजाने व्यवस्था गर्ने सहमति गरेको छ। शव गाउँमै पुर्‍याएर दाहसंस्कार गर्ने व्यवस्था मिलाइने गृह मन्त्रालयले जनाएको छ।

घटनामा मृत्यु भएका तीन जनाको सम्झनामा स्थानीय सरकारसँग समन्वय गरी यसै वर्ष बजेट विनियोजन गरेर गाउँपालिकाको उपयुक्त स्थानमा स्मृति पार्क निर्माण गर्ने सहमति पनि भएको छ।

सात बुँदे सहमतिले पीडित परिवारको माग सम्बोधनसँगै घटनाको निष्पक्ष छानबिन, दोषीमाथि कारबाही र मृतकहरूको स्मृतिमा संरचना निर्माण गर्ने प्रतिबद्धता समेटेको छ।

Originally published on abcnews.com.np.