बागलुङ । बागलुङ उद्योग वाणिज्य संघसहित विभिन्न गैरसरकारी संस्थाले संयुक्त रूपमा रकम संकलन गरी जिल्ला विपद् व्यवस्थापन समितिलाई नदीजन्य विपद्मा खोज तथा उद्धारका लागि आवश्यक सामग्री सहयोग गरेका छन्।

सोमबार आयोजित कार्यक्रममा गैरसरकारी संस्था महासंघ बागलुङका अध्यक्ष मुक्तिराम सापकोटाले विपद् व्यवस्थापन समितिका अध्यक्ष तथा प्रमुख जिल्ला अधिकारी कृष्णप्रसाद आचार्यलाई सामग्री हस्तान्तरण गरेका हुन्। वर्षायाममा नदी तथा खोलामा हुन सक्ने दुर्घटनामा उद्धारका लागि सामग्री उपयोगी हुने बताइएको छ।

सामग्री खरिदका लागि आईएनएफ नेपालले ३ लाख, नेपाल गाजा डेभलपमेन्ट फाउण्डेसन (एनजीडीएफ)ले १ लाख, सीवाईसी नेपालले १ लाख र बागलुङ उद्योग वाणिज्य संघले ५० हजार रुपैयाँ सहयोग गरेका थिए। नेपाल रेडक्रस सोसाइटीलगायत अन्य संस्थाको सहयोगसमेत जोडेर ७ लाख ३१ हजार १ सय १० रुपैयाँको लागतमा सामग्री खरिद गरिएको हो।

¥याफ्टिङ डुंगादेखि लाइफ ज्याकेटसम्म

खोज तथा उद्धारका लागि ¥याफ्टिङ डुंगा, आठ थान लाइफ ज्याकेट, आठ थान हेलमेट, आवश्यक डोरी, बनियानलगायत सामग्री समितिलाई हस्तान्तरण गरिएको छ।

नेपाल उद्योग वाणिज्य महासंघ गण्डकी प्रदेशका अध्यक्ष नरेश कँडेलले गुणस्तरीय कम्पनीबाट सामग्री खरिद गरी हस्तान्तरण गरिएको जानकारी दिए। विपद्का समयमा खोज तथा उद्धारमा सामग्रीले ठूलो राहत पुग्ने अपेक्षा गरिएको बताउँदै उनले अन्य आवश्यक उपकरण जुटाउनसमेत पहल भइरहेको बताए।

ड्रोन र एम्बुलेन्स जुटाउने तयारी

कँडेलका अनुसार खोज तथा उद्धारका लागि ड्रोन र जिल्ला विपद् व्यवस्थापन समितिका लागि एउटा एम्बुलेन्ससमेत आवश्यक छ। त्यसका लागि स्रोत खोजी भइरहेको उनले जानकारी दिए।

प्रमुख जिल्ला अधिकारीको अध्यक्षतामा बसेको बैठकले गृह मन्त्रालयको परिपत्रअनुसार स्थानीय तहमा आवश्यक सामग्री जुटाउने निर्णय गरेपछि बागलुङ उद्योग वाणिज्य संघले सहयोगका लागि पहल थालेको थियो। संघका अध्यक्ष राजनकुमार शाक्यले गैरसरकारी संस्थाहरूले उक्त अभियानमा साथ दिएको बताए।

कालीगण्डकी किनारमा उद्धार सामग्रीको अभाव

बागलुङ, पर्वत र म्याग्दी जिल्लाको करिब एक सय किलोमिटर क्षेत्र कालीगण्डकी नदी किनारमा पर्छ। तर, यसअघि नदीजन्य दुर्घटनामा खोज तथा उद्धारका लागि पर्याप्त सामग्री उपलब्ध थिएन।

अब आवश्यक सामग्री उपलब्ध भएपछि सशस्त्र प्रहरी बल आश्रित गुल्म र नेपाल प्रहरीको विपद् उद्धार गुल्मले उद्धार कार्य सञ्चालन गर्नेछन्। दुवै गुल्ममा दक्ष उद्धारकर्मी रहेका छन् भने आवश्यक परेको अवस्थामा नेपाली सेनाको सहयोगसमेत लिइनेछ।

बाढीपहिरोमा उद्धार सहज हुने अपेक्षा

जिल्ला विपद् व्यवस्थापन समितिमार्फत आगलागी, सडक दुर्घटना, बाढीपहिरोलगायत विपद्मा खोज तथा उद्धारका काम हुँदै आएका छन्। आगलागी नियन्त्रणका लागि पनि गैरसरकारी संस्थाहरूले सामग्री सहयोग गर्दै आएका छन्।

वर्षायाममा कालीगण्डकीसहित सहायक खोला तथा नदीमा बाढी आउने र पहिरो जाने क्रम बढ्ने भएकाले उद्धार सामग्री अत्यावश्यक रहेको जिल्ला समन्वय समिति बागलुङका प्रमुख अमर थापाले बताए।

बाढीपहिरोका कारण मानिस तथा पशुचौपाया बेपत्ता हुने अवस्था रहेकाले उपलब्ध सामग्रीबाट तत्काल उद्धार गरी धनजनको क्षति न्यूनीकरण गर्न सकिने उनको भनाइ छ। उनले जिल्लाका प्रत्येक स्थानीय तहमा यस्ता उद्धार सामग्रीको व्यवस्था गर्न आग्रह गरेका छन्। वडा तहमा आगलागी नियन्त्रणका लागि आवश्यक विद्युतीय उपकरणसमेत राख्न उनले सुझाव दिए।

Originally published on abcnews.com.np.