काठमाडौं । कोलम्बियामा सोमबार गएको शक्तिशाली ७.४ म्याग्निच्युडको भूकम्पमा परी मृत्यु हुनेको संख्या १३२ पुगेको छ । भूकम्पमा ५७० जना घाइते भएका छन् । उद्धार कार्य जारी रहेकाले मृतकको संख्या अझ बढ्न सक्ने अधिकारीहरूले बताएका छन् ।

भूकम्पका कारण पश्चिमी कोलम्बियाका विभिन्न क्षेत्रमा भवनहरू भत्किएका छन् । भग्नावशेषमा अझै मानिसहरू फसेको आशंकामा उद्धारकर्मीहरूले खोजी तथा उद्धारलाई तीव्र बनाएका छन् । सरकारले राष्ट्रिय आपत्कालीन अवस्था घोषणा गर्दै उद्धार तथा राहतलाई प्राथमिकता दिएको छ ।

कोलम्बियाको भूगर्भ सेवाका अनुसार स्थानीय समयअनुसार सोमबार बिहान ७ः३४ बजे गएको भूकम्पको केन्द्रबिन्दु चोको प्रान्तको सान होसे डेल पाल्मार क्षेत्रमा रहेको थियो । भूकम्प करिब १०७ किलोमिटर गहिराइमा गएको अमेरिकी भूगर्भ सर्वेक्षण (यूएसजीएस)ले जनाएको छ । यो भूकम्प २१औँ शताब्दीमा कोलम्बियामा रेकर्ड भएको सबैभन्दा शक्तिशाली भूकम्प भएको बताइएको छ ।

भूकम्पबाट काली, पेरेरा, आर्मेनिया, मानिजालेस र क्विब्दोलगायतका क्षेत्रमा ठूलो क्षति पुगेको छ । पेरेरा सबैभन्दा बढी प्रभावित सहरमध्ये एक हो । त्यहाँ ठूलो मानवीय क्षति भएको र उद्धारकर्मीहरूले भत्किएका संरचनामा फसेका मानिसको खोजी गरिरहेका छन् ।

चोकोजस्ता दुर्गम क्षेत्रमा सञ्चार सेवा प्रभावित भएकाले क्षतिको पूर्ण विवरण संकलन गर्न कठिनाइ भइरहेको छ । विभिन्न क्षेत्रमा अस्पताल तथा पूर्वाधारमा क्षति पुगेको छ भने केही विमानस्थलमा सुरक्षा परीक्षणका लागि उडानसमेत अस्थायी रूपमा रोकिएको छ ।

भूकम्पपछि परकम्पसमेत गइरहेका छन् । उद्धारकर्मीहरूले भग्नावशेषमा जीवित मानिस फेला पार्ने सम्भावनालाई ध्यानमा राख्दै खोजी जारी राखेका छन् । सरकारले प्रभावित क्षेत्रमा राहत तथा सुरक्षा व्यवस्थापनलाई थप प्रभावकारी बनाउने जनाएको छ ।

Originally published on abcnews.com.np.