घोराही, दाङ । दाङमा अधिकांश क्षेत्रमा धान रोपाइँ सम्पन्न भए पनि पर्याप्त वर्षा नहुँदा सिँचाइ सुविधा नपुगेका केही क्षेत्रका खेत अझै बाँझै रहेका छन् । घोराही उपमहानगरपालिका–८ ढिकपुर र वडा नं. ९ बकुलाईलगायतका क्षेत्रमा सिँचाइ अभावका कारण किसानले समयमै धान रोप्न नपाएका हुन् ।

ढिकपुरका किसान जगदीशकुमार हरिजनले कुवाको पानीबाट सीमित क्षेत्रफलमा मात्रै धान रोप्न सकेको बताउनुभयो । टाढाका खेतमा सिँचाइ पुग्न नसक्दा धेरै जग्गा बाँझै रहेको उहाँको भनाइ छ ।

“खेतमा सिँचाइ सुविधा नहुँदा अहिलेसम्म धान रोप्न सकेका छैनौँ, खेत बाँझै छ,” उहाँले भन्नुभयो, “धान उत्पादन गरेर वर्षभरि खानका लागि जोहो गर्ने र बढी भएको बिक्री गरेर घरखर्च चलाउने हुन्थ्यो । यो वर्ष खेती नै नहुँदा चिन्ता बढेको छ ।”

ढिकपुर जलाशयको पानी मोटरमार्फत तानेर खेती गर्दै आएका किसानसमेत पानीको अभावमा समस्यामा परेका छन् । आकाशे पानीमा निर्भर किसानले समयमै रोपाइँ गर्न नपाउँदा उत्पादन घट्ने चिन्ता बढेको किसान टेकबहादुर खड्काले बताउनुभयो ।

घोराही–९ बकुलाईका किसान निमबहादुर केसीको खेत पनि पर्याप्त पानी नपरेका कारण बाँझै छ । सामान्यतया असारको अन्तिम सातादेखि साउनको पहिलो सातासम्म रोपाइँ सकिने भए पनि यस वर्ष पानीको अभावले रोपाइँ प्रभावित भएको उहाँले बताउनुभयो ।

“ब्याड राख्यौँ, खेत पनि जोतिसक्यौँ । पानी परेपछि फेरि जोतेर रोप्ने तयारी थियो तर पानी नै पर्याप्त परेन,” उहाँले भन्नुभयो, “ब्याडसमेत पहेँलो हुन थालेको छ ।”

किसानका अनुसार बकुलाई क्षेत्रमा मात्रै करिब २० देखि २५ बिघा खेत बाँझै रहेको छ । सिँचाइका लागि डिपबोरिङ खनिए पनि पर्याप्त पानी नआउँदा समस्या भएको उनीहरूको भनाइ छ ।

९५ प्रतिशत रोपाइँ सम्पन्न

कृषि ज्ञान केन्द्र दाङका अनुसार जिल्लामा हालसम्म करिब ९५ प्रतिशत धान रोपाइँ सम्पन्न भएको छ । जिल्लामा धान खेती हुने कुल ३६ हजार २२५ हेक्टर क्षेत्रफलमध्ये ३४ हजार ४०० हेक्टरमा रोपाइँ सकिएको केन्द्रले जनाएको छ ।

सिँचाइ सुविधा पुगेका अधिकांश क्षेत्रमा रोपाइँ सम्पन्न भए पनि भरपर्दो सिँचाइको व्यवस्था नभएका क्षेत्रमा अझै केही खेत बाँझै रहेको केन्द्रको भनाइ छ । वर्षा पर्याप्त नभए बाँकी क्षेत्रमा समेत रोपाइँ प्रभावित हुने र धान उत्पादनमा असर पर्न सक्ने किसानको चिन्ता छ ।

Originally published on abcnews.com.np.