गौशाला (महोत्तरी) । साउन चौथो साता सकिन लाग्दासमेत पर्याप्त मनसुनी वर्षा नहुँदा महोत्तरीसहित तराई–मधेसमा गर्मी बढेको छ। केही दिनयता मध्याह्नको तापक्रम ३८ देखि ४१ डिग्री सेल्सियससम्म पुग्न थालेपछि जनजीवन प्रभावित भएको छ।

सूर्योदयदेखि साँझसम्म चर्को घाम लाग्ने र वर्षा भएलगत्तै पुनः टन्टलापुर घाम लाग्ने क्रमले गर्मी थप बढाएको स्थानीयवासी बताउँछन्। मध्याह्नमा घरबाहिर निस्कनसमेत कठिन हुने गरी तापक्रम बढेपछि दैनिक कामकाज प्रभावित भएको छ।

जल तथा मौसम विज्ञान कार्यालय जनकपुरका प्रमुख राजीव झाका अनुसार मंगलबार जनकपुरधामको अधिकतम तापक्रम ४१ डिग्री सेल्सियस पुगेको थियो। महसुस हुने तापक्रम भने करिब ४८ डिग्री सेल्सियससम्म पुगेको उनले बताए।

मधेशमा मनसुन पूर्ण रूपमा सक्रिय नभएकाले अपेक्षित वर्षा हुन नसकेको र वर्षा रोकिएपछि चर्को घाम लाग्दा वाष्पीकरण बढेर गर्मी थप बढेको झाको भनाइ छ। उनका अनुसार आगामी दुई दिनसम्म पनि गर्मीको अवस्था यस्तै रहने सम्भावना छ।

‘लु’को जोखिम

वातावरण विज्ञ अशोक यादवका अनुसार तराई–मधेसमा केही दिनयता ‘लु’ अर्थात् तातो हावाको प्रभाव बढेको छ। मधेश प्रदेशका विभिन्न जिल्लामा तापक्रम ४० डिग्रीभन्दा माथि पुग्न थालेकाले तातो हावाको जोखिम बढेको उनले बताए। यो अवस्था शुक्रबारसम्म कायम रहन सक्ने उनको अनुमान छ।

जनजीवन प्रभावित

चर्को गर्मीका कारण खेतमा काम गर्न, बजार जान तथा अन्य दैनिक गतिविधि सञ्चालन गर्न कठिनाइ भइरहेको स्थानीयवासीले बताएका छन्। गर्मी बढेसँगै मानिसहरू दिउँसो घरभित्रै बस्न बाध्य हुँदा व्यापार–व्यवसायसमेत प्रभावित भएको छ।

Originally published on abcnews.com.np.