काठमाडौं । प्रहरी महानिरीक्षक दानबहादुर कार्कीले विद्युतीय सवारीसाधन तथा वातावरणमैत्री मोबिलिटीका क्षेत्रमा निजी क्षेत्रले देखाएको सक्रियता प्रशंसनीय रहेको बताएका छन्।

मंगलबार काठमाडौंको भृकुटीमण्डपमा आयोजित ‘नाइमा नेपाल मोबिलिटी एक्स्पो–२०२६’ उद्घाटन समारोहमा बोल्दै महानिरीक्षक कार्कीले निजी क्षेत्रको यस्तो पहलले दिगो, सुरक्षित तथा वातावरणमैत्री सहरी यातायात विकासमा महत्वपूर्ण योगदान पुर्‍याउने विश्वास व्यक्त गरे।

नेपालजस्तो मुलुकका लागि इन्धन खपत घटाउन विद्युतीय सवारीसाधनको प्रयोग आवश्यक रहेको उनले बताए। नेपाल प्रहरीले पनि वातावरण संरक्षणमा योगदान पुर्‍याउने उद्देश्यले पछिल्ला वर्षमा विद्युतीय सवारीसाधनको प्रयोग क्रमशः बढाउँदै लगेको जानकारी उनले दिए।

महानिरीक्षक कार्कीले नेपालमा सडक दुर्घटनाको अवस्था भने गम्भीर रहेको बताए। उनका अनुसार आर्थिक वर्ष २०८२/८३ मा देशभर २९ हजार ९८८ सडक दुर्घटना भएका छन्, जुन अघिल्लो आर्थिक वर्षको तुलनामा ४.३२ प्रतिशतले बढी हो।

उनका अनुसार नेपालमा दैनिक औसत ८२ वटा सडक दुर्घटना हुने गरेका छन्। दुर्घटनामा दैनिक औसत १३० जना घाइते हुने र सातजनाको मृत्यु हुने गरेको उनले बताए।

आर्थिक वर्ष २०८२/८३ मा मात्रै सडक दुर्घटनामा २ हजार ७०७ जनाको मृत्यु भएको र ४७ हजार ५५३ जना घाइते भएको तथ्यांक उनले प्रस्तुत गरे।

कार्कीले सडक दुर्घटनाको यस्तो अवस्था अत्यन्त गम्भीर रहेको भन्दै विद्युतीय तथा वातावरणमैत्री सवारीसाधनको विस्तारसँगै सडक सुरक्षालाई पनि समान प्राथमिकता दिनुपर्नेमा जोड दिए।

‘अबको मोबिलिटी सुरक्षित पनि हुनुपर्छ’

महानिरीक्षक कार्कीले मोबिलिटीलाई केवल सवारीसाधनको आवागमनका रूपमा मात्र बुझ्न नहुने बताए। उनका अनुसार मानिस, पुँजी, व्यवसाय, उपभोग र रोजगारी निरन्तर गतिशील हुँदा मात्रै अर्थतन्त्र पनि चलायमान हुन्छ।

“मोबिलिटी केवल सवारीको आवागमन होइन, आर्थिक, सामाजिक र समग्र जीवनलाई चलायमान बनाउने माध्यम हो,” उनले भने।

उनले आगामी दिनको यातायात प्रणाली दिगो, वातावरणमैत्री र सुरक्षित हुनुपर्ने बताए। सडक दुर्घटना न्यूनीकरण तथा सुरक्षित यातायातका लागि सरकार, निजी क्षेत्र, सुरक्षा निकाय र नागरिक सबैको समान भूमिका आवश्यक रहेको उनको भनाइ थियो।

“विद्युतीय तथा वातावरणमैत्री सवारीतर्फ निजी क्षेत्रको बढ्दो अग्रसरता प्रशंसनीय छ। यसले दिगो, सुरक्षित र वातावरणमैत्री सहरी यातायात विकासमा महत्वपूर्ण योगदान पुर्‍याउँछ,” कार्कीले भने।

उनले नेपाल प्रहरीले पनि विद्युतीय सवारीसाधनको प्रयोग बढाउँदै वातावरण संरक्षणमा योगदान दिइरहेको उल्लेख गर्दै मोबिलिटीको विकाससँगै सडक सुरक्षालाई सबैभन्दा महत्वपूर्ण विषयका रूपमा लिनुपर्ने बताए।

Originally published on abcnews.com.np.