काठमाडौं । श्रम संस्कृति पार्टीका अध्यक्ष हर्क साम्पाङले देशमा नागरिकसँगै सांसदसमेत सुरक्षित नरहेको भन्दै सरकारको कार्यशैलीप्रति प्रश्न उठाएका छन्।

मंगलबार प्रतिनिधि सभाको बैठकमा बोल्दै साम्पाङले देशमा सुरक्षा, न्याय र सेवा प्रवाहको अवस्था कमजोर बन्दै गएको दाबी गरे। उनले नागरिकले आफू सुरक्षित रहेको अनुभूति गर्न नसकेको बताए।

“कस्तो देशमा छौँ भन्ने प्रश्नको उत्तर खोजिरहेका छौँ। जुन देशमा सुरक्षा छैन, न्याय छैन, सेवा–सुविधा पनि छैन,” उनले भने, “नागरिक सुरक्षित छैनन्। हामी सांसदहरू पनि सुरक्षित छैनौँ। जे पनि हुने खालको स्थिति छ।”

साम्पाङले देशका विभिन्न क्षेत्रमा झगडा, आगजनी तथा धम्कीका घटना बढिरहेको दाबी गरे। यस्ता घटनाबारे जानकारी गराउँदा समेत प्रभावकारी कारबाही हुन नसकेको उनको आरोप छ।

“देशमा झगडा भइरहेको छ, आगजनी भइरहेको छ। धम्की आइरहेको छ। यस्ता घटनाबारे रिपोर्ट गर्दा पनि कारबाही नहुने स्थिति छ,” उनले भने, “यात्रा गर्दासमेत असुरक्षित महसुस गर्नुपर्ने अवस्था छ।”

उनले न्यायको माग गर्दै लामो समयदेखि माइतीघरमा बसेका नागरिकप्रति पनि सरकारले पर्याप्त ध्यान नदिएको गुनासो गरे। महिनौँदेखि न्यायको माग गर्दै आन्दोलनरत नागरिकको अवस्था बुझ्न मन्त्रीहरू आफैँ सडकमा पुग्नुपर्ने उनको भनाइ थियो।

“न्याय पनि छैन यो देशमा। कति मानिसहरू त महिनौँदेखि माइतीघरमा बसिरहेका छन्,” साम्पाङले भने, “उनीहरूलाई भेट्न मन्त्रीहरू जानुहुन्छ? मन्त्रालयमा एसीको हावा खाएर मात्रै देश बुझिन्न, सडकमा गएर जनताको दुःखसुख थाहा पाउनुपर्छ।”

सरकारको कार्यशैलीप्रति आलोचना

साम्पाङले सरकार जनताको वास्तविक समस्याप्रति संवेदनशील हुन नसकेको आरोप लगाए। उनले सत्तामा रहेका व्यक्तिले जनताको दैनिक कठिनाइ प्रत्यक्ष अनुभव गर्नुपर्ने बताए।

“जनताको पीडा बुझ्नुपर्छ। एसीको कोठा छ, एसीकै गाडी छ, घरमा पनि एसी छ, तर दिनभर ग्यासको लाइनमा बस्नेहरूको पीडा कहिले बुझ्ने हो?” उनले प्रश्न गरे।

उनले तत्कालीन प्रधानमन्त्री पुष्पकमल दाहाल ‘प्रचण्ड’को कार्यशैलीप्रति समेत आलोचना गर्दै विपक्षी दल, नागरिक र आफ्नै सरकारका मन्त्रीहरूसँग समेत प्रभावकारी समन्वय गर्न नसकेको आरोप लगाए।

साम्पाङले देशमा देखिएका समस्या सरकारको लापरवाही र गैरजिम्मेवार कार्यशैलीसँग जोडिएको दाबी गर्दै जनताको समस्या बुझ्न सरकार सडक र नागरिकको बीचमा पुग्नुपर्नेमा जोड दिए।

Originally published on abcnews.com.np.