काठमाडौँ । अग्नि ग्रुपअन्तर्गतको अग्नि मोटोइंक प्रालिले भारतीय विद्युतीय दुईपांग्रे ब्रान्ड बिगससँगको सहकार्यमा नेपाली बजारमा दुई नयाँ प्रिमियम विद्युतीय स्कुटर सार्वजनिक गरेको छ।

काठमाडौँको भृकुटीमण्डपमा जारी ‘नाडा मोबिलिटी एक्स्पो २०२६’ मा कम्पनीले ‘बिजी सी१२ म्याक्स आर’ र ‘उवा म्याक्स प्लस’ मोडल सार्वजनिक गरेको हो। कम्पनीले यी स्कुटरले नेपालमा स्वच्छ तथा दिगो यातायाततर्फको रूपान्तरणलाई थप गति दिने अपेक्षा गरेको छ।

बिगस अटो प्रालिका वरिष्ठ उपाध्यक्ष सतीश शेट्टीले नेपालमा व्यवसाय विस्तारका लागि अग्नि मोटोइंकसँगको साझेदारी महत्त्वपूर्ण रहेको बताए। उनले नयाँ मोडलमार्फत नेपाली उपभोक्ताले आधुनिक प्रविधि र विश्वस्तरीय इन्जिनियरिङको अनुभव लिन सक्ने दाबी गरे।

सी१२ म्याक्स आरमा १६० किलोमिटर रेन्ज

पारिवारिक प्रयोग तथा दैनिक आवागमनलाई लक्षित गरिएको सी१२ म्याक्स आर ले एकपटकको पूर्ण चार्जमा १६० किलोमिटरसम्म रेन्ज दिने कम्पनीले जनाएको छ। यसको अधिकतम गति ७५ किलोमिटर प्रतिघण्टा रहेको छ।

स्कुटरमा ४.२ किलोवाटको मोटर र ३.८ किलोवाट–घण्टाको ब्याट्री जडान गरिएको छ। यसमा क्रुज कन्ट्रोल, साइड–स्ट्यान्ड सेन्सर र ४० लिटरभन्दा बढीको स्टोरेज क्षमता उपलब्ध छ।

Originally published on abcnews.com.np.