काठमाडौँ । नेपाली कांग्रेसका नेता एवं राष्ट्रिय भेला आयोजक समितिका संयोजक डा. शशांक कोइरालाले सभापति गगनकुमार थापालाई पत्र पठाउँदै आगामी १५औँ महाधिवेशनसहित पार्टीका सांगठनिक गतिविधि तत्काल रोक्न आग्रह गरेका छन्।

मंगलबार कांग्रेस केन्द्रीय कार्यसमितिलाई सम्बोधन गर्दै पठाइएको तीनबुँदे पत्रमा सर्वोच्च अदालतले कांग्रेसको आधिकारिकतासम्बन्धी मुद्दामा पुनरवलोकनका लागि अनुमति दिएको विषयलाई आधार बनाइएको छ। सर्वोच्चले साउन २२ गते पुनरवलोकनका लागि निस्सा प्रदान गरेपछि उक्त मुद्दामा पुनः सुनुवाइ हुने भएको छ।

डा. कोइरालाले सर्वोच्चबाट अन्तिम फैसला नआएसम्म १५औँ महाधिवेशन वा विशेष महाधिवेशनसँग सम्बन्धित कुनै पनि गतिविधि अघि नबढाउन आग्रह गरेका छन्।

महाधिवेशनका गतिविधि रोक्न माग

पत्रको पहिलो बुँदामा आगामी १५औँ महाधिवेशन वा विशेष महाधिवेशनसँग सम्बन्धित सांगठनिक, प्राविधिक तथा नीतिगत कार्यतालिका तत्काल स्थगित गर्न माग गरिएको छ।

त्यस्तै, अदालतको अन्तिम फैसला नआएसम्म पार्टीका तर्फबाट दीर्घकालीन प्रभाव पार्ने कुनै पनि नीतिगत, राजनीतिक, सांगठनिक वा आर्थिक निर्णय नगर्न कोइरालाले आग्रह गरेका छन्।

अदालतको प्रक्रियालाई सम्मान गर्न आग्रह

कोइरालाले सर्वोच्च अदालतको पूर्ण इजलासबाट अन्तिम फैसला नआएसम्म पार्टीका सांगठनिक संरचनालाई साविककै अवस्थामा राख्नुपर्ने बताएका छन्। साथै, अदालतको गरिमा र कानुनी प्रक्रियालाई पूर्ण रूपमा सम्मान गर्दै सहयोग गर्न उनले आग्रह गरेका छन्।

महाधिवेशनलगायतका गतिविधि अघि बढाउँदा अदालतमा विचाराधीन मुद्दालाई असर पर्न सक्ने भन्दै उनले त्यसबाट अदालतको अपहेलनालगायत कानुनी जटिलता उत्पन्न हुन सक्ने चेतावनीसमेत दिएका छन्।

पत्रमा भनिएको छ, अदालतमा विचाराधीन मुद्दाको अन्तिम परिणामलाई असर पर्ने गरी कुनै पनि गतिविधि अघि नबढाउन कानुनी ध्यानाकर्षण गराइएको छ।

विभिन्न निकायलाई बोधार्थ

कोइरालाले कांग्रेस केन्द्रीय कार्यसमितिलाई पठाएको उक्त पत्र सभापति गगनकुमार थापा, प्रदेश तथा जिल्ला कार्यसमिति, क्षेत्रीय तथा स्थानीय तह, वडा, जनसम्पर्क समिति र निर्वाचन आयोगलाई समेत बोधार्थ पठाएका छन्।

Originally published on abcnews.com.np.