काठमाडौँ । निसानले आफ्नो नयाँ एसयूभी ‘टेकटन’ नेपाली बजारमा सार्वजनिक गरेको छ। नाइमा मोबिलिटी एक्स्पो २०२६ को अवसरमा कम्पनीले टेकटन सार्वजनिक गरेको हो।

नेपाली बजारमा एसयूभीप्रति बढ्दो आकर्षणलाई ध्यानमा राख्दै निसानले नयाँ मोडल भित्र्याएको जनाएको छ। टेकटनको मूल्य ५१ लाख २९ हजार रुपैयाँ निर्धारण गरिएको कम्पनीले जनाएको छ।

टेकटनमार्फत नेपाली बजारमा आफ्नो एसयूभी पोर्टफोलियो थप विस्तार गर्ने निसानको योजना छ। कम्पनीले नयाँ मोडलले मध्यम तथा प्रिमियम एसयूभी खोज्ने ग्राहकका लागि थप विकल्प उपलब्ध गराउने अपेक्षा गरेको छ।

टेकटनको बाहिरी डिजाइन आधुनिक र बोल्ड एसयूभी स्वरूपमा तयार गरिएको छ। ठूलो आकारको बडी, नयाँ पुस्ताको डिजाइन भाषा तथा आकर्षक इन्टेरियर यसका प्रमुख विशेषता रहेको कम्पनीले जनाएको छ।

कम्पनीका अनुसार टेकटनमा आरामदायी यात्रा अनुभवलाई प्राथमिकता दिइएको छ। आधुनिक डिजाइन र नयाँ पुस्ताका सुविधासहित नेपाली बजारमा प्रवेश गरेको यो मोडलले एसयूभी सेग्मेन्टमा निसानको उपस्थिति थप बलियो बनाउने अपेक्षा गरिएको छ।

Originally published on abcnews.com.np.