बागलुङ । बागलुङ उद्योग वाणिज्य संघको महिला उद्यम विकास समितिले महिला उद्यमीलाई साबुन तथा सरफ उत्पादनसम्बन्धी तालिम दिन थालेको छ।

पाँच दिनसम्म सञ्चालन हुने तालिममा सहभागीले व्यक्तिगत प्रयोगका लागि साबुन, कपडा धुने सरफ तथा हात धुने वास बनाउने सीप सिक्नेछन्। मंगलबार आयोजित कार्यक्रममा २५ जना उद्यमीका लागि तालिम सुरु गरिएको हो।

तालिमको उद्घाटन गर्दै नेपाल उद्योग वाणिज्य महासंघ गण्डकी प्रदेशका अध्यक्ष नरेश कँडेलले सीपलाई उद्यम र उद्यमलाई आत्मनिर्भर तथा सफल व्यवसायमा रूपान्तरण गर्न सहभागीलाई आग्रह गरे। उनले स्थानीय स्तरमै विभिन्न प्रकारका वस्तु उत्पादन गर्न सके आयात प्रतिस्थापनमा सहयोग पुग्ने बताए।

स्थानीय उत्पादन बढाउनु देशको आर्थिक विकासमा समेत महत्वपूर्ण हुने उल्लेख गर्दै कँडेलले थप सीप विकासका लागि महासंघले आवश्यक सहयोग गर्ने प्रतिबद्धता जनाए।

बागलुङ उद्योग वाणिज्य संघका अध्यक्ष राजनकुमार शाक्यले महिला उद्यमीलाई दक्ष बनाएर जिल्लाको व्यवसाय विस्तार गर्ने उद्देश्यले विभिन्न प्रकारका तालिम सञ्चालन गर्दै आएको बताए। दक्षता हासिल गरेका उद्यमीलाई व्यवसाय सुरु गर्न आवश्यक पर्ने सहुलियतपूर्ण कर्जाका लागि बैंक तथा वित्तीय संस्थासँग समन्वय भइरहेको उनले जानकारी दिए।

महिला उद्यम विकास समितिकी अध्यक्ष पिंगला जिसीले विभिन्न स्रोतबाट रकम जुटाएर करिब १ लाख ३० हजार रुपैयाँको लागतमा पाँचदिने तालिम सञ्चालन गरिएको बताइन्। उद्यममा संलग्न महिलाले समेत तालिममा सहभागी हुन चासो देखाएको उनले जानकारी दिइन्।

तालिममा सहजीकरण गर्न काभ्रेबाट ममता चौलागाईं र विश्वास ढुंगेल प्रशिक्षकका रूपमा आएका छन्।

तालिम उद्घाटन कार्यक्रम महिला उद्यम विकास समितिकी अध्यक्ष पिंगला जिसीको अध्यक्षतामा भएको थियो भने महासचिव रम्बादेवी शाक्यले कार्यक्रम सञ्चालन गरेकी थिइन्।

Originally published on abcnews.com.np.