काठमाडौं । नेपाली कांग्रेसका पूर्वसभापति शेरबहादुर देउवा नेपाल फर्किने तयारीमा रहनुभएको छ । उहाँलाई स्वतन्त्र आवागमनमा कुनै अवरोध र हस्तक्षेप नगर्ने सरकारी आश्वासन प्राप्त भएको स्रोतले जनाएको छ ।

सरकारले देउवाको नेपाल आउँदा धरपकड नगर्ने रणनीति लिएको छ, उच्च स्रोतका अनुसार यो कुरा देउवाले ढुक्क भएर फर्किन सक्ने परिस्थिति बनाएको हो । देउवा साउन २८ गते १२ः३० मा नेपाल फर्किने तय भएको छ ।

पूर्वप्रधानमन्त्रीसमेत रहनुभएका देउवा जेनजी आन्दोलनका क्रममा गरिएको सांघातिक आक्रमणमा घाइते भएपछि उपचारका लागि कात्तिक १० गते राति सिंगापुर जानुभएको थियो। सरकार निकटस्थ स्रोतले देउवाको आवागमनमा कुनै बाधा अवरोध नगर्ने गरी ‘भद्र समझदारी’ भएको जानकारी दिएको छ । प्रधानमन्त्री वालेन्द्र शाह र रास्वपा सभापति रवि लामिछानेसम्मलाई यो विषयमा जानकारी दिइएको ती उच्च अधिकारीको दाबी छ ।

स्रोतले भन्यो, “ढुक्क भएर उहाँ (देउवा) स्वदेश फर्किंदै हुनुहुन्छ । स्वतन्त्र आवागनमा कुनै बाधा अवरोध या धरपकड त्यस्तो केही नगर्ने, बरु निजी निवाससम्मै कडा सुरक्षामा राखेर पठाउने भन्ने छ ।” देउवा फर्किने दिन सुरक्षाकर्मीले विशेष सुरक्षा दिएर निजी निवास महाराजगञ्जसम्म पुर्याउने तयारी रहेको छ । सरकार निकटस्थ उच्च स्रोतले देउवाको वैयक्तिक स्वतन्त्रतामा हस्तक्षेप नहुने वातावरण तय गर्न एकजना उच्चस्तरका व्यक्तिमार्फत् सहजीकरण गरिएको जानकारी दिए पनि गोपनीयताका कारण नाम खुलाउन चाहेन।

पक्राउ पुर्जी र अदालतको आदेश

देउवा दम्पती सिंगापुरमै रहनुभएको बेला उनीहरूविरुद्ध सम्पत्ति शुद्धीकरण अनुसन्धान विभाग र नेपाल प्रहरीको केन्द्रीय अनुसन्धान ब्युरो (सीआईबी) ले पक्राउ पुर्जी जारी गरेका थिए । सम्पत्ति शुद्धीकरणको अनुसन्धानका लागि उक्त पुर्जी जारी भएको थियो ।

त्यसयत् पक्राउ पुर्जी रोक्न माग राखेर वारेशमार्फत दिएको एक रिटमा सर्वोच्च अदालतले पूर्वप्रधानमन्त्री देउवा र उनकी पत्नी डा. आरजु राणा देउवालाई तत्काल पक्राउ नगर्न अन्तरिम आदेश जारी गरेको थियो । सर्वोच्चका न्यायाधीशहरू महेश शर्मा पौडेल र नित्यानन्द पाण्डेयको संयुक्त इजलासले गत जेठ ११ गते सीआईबी र विभागका नाउँमा सो आदेश जारी गरेको हो ।

विभागले काठमाडौँ जिल्ला अदालतबाट पक्राउ अनुमति लिएको थियो । सम्पत्ति शुद्धीकरणको मुद्दा हेर्ने क्षेत्राधिकार विशेष अदालतको भएको दाबी गर्दै देउवा दम्पतीले काठमाडौं जिल्ला अदालतबाट गैरकानुनी पक्राउ पुर्जी जारी गरिएको जिकिर सर्वोच्चमा गरेका थिए।

देउवाको प्रतिबद्धता र अन्य गतिविधि

देउवाले सिंगापुरबाटै जारी गरेको प्रेस वक्तव्य र सर्वोच्चमा दिएको रिटमा पनि आफूहरू अनुसन्धानमा सहयोग गर्न मञ्जुर भएको, सम्पत्तिको स्रोत देखाउन तयार रहेको बताउँदै पक्राउ गर्नुपर्ने अवस्था नरहेको स्पष्ट गर्नुभएको थियो ।

jिल्ला अदालतबाट पक्राउ अनुमति लिएलगत्तै विभागले देउवा दम्पतीविरुद्ध ‘रेड कर्नर नोटिस’ जारी गर्ने प्रक्रिया सुरु गरेको थियो, तर इन्टरपोलले सो नोटिस जारी गर्न अस्वीकार गरेको थियो । सर्वोच्चको अन्तरिम आदेश, इन्टरपोलको रेड नोटिस जारी नभएको अवस्था र देउवा दम्पती स्वयंले आफूहरू अनुसन्धानमा सहयोग गर्न मञ्जुर रहेको भन्दै प्रतिबद्धता व्यक्त गरिसकेको अवस्थामा पक्राउ गर्नुपर्ने अवस्था नरहे पनि विभिन्न आशंका उत्पन्न हुँदै आएका थिए । सरकारले देउवादम्पतीविरुद्ध प्रतिशोधको राजनीति गर्न सक्ने संशय व्यक्त भइरहेको थियो।

यसैबीच, देउवाले नेकपा एमालेका अध्यक्ष केपी शर्मा ओली र नेकपाका अध्यक्ष पुष्पकमल दाहाल ‘प्रचण्ड’सँग पनि सम्पर्क गर्नुभएको स्रोतले जानकारी दिएको छ । प्रचण्डले आफू निकटस्थ व्यक्तिमार्फत देउवासँग कुराकानी भएको पुष्टि गरेका छन्। प्रचण्ड निकट एक नेताले बताए, “अदालतको पुनरवलोकन निस्सापछि अध्यक्षसँग देउवाको कुराकानी भएको थियो ।”

Originally published on abcnews.com.np.