काठमाडौं । जेनजी अभियन्ता अजय सोडारी (पूर्णबहादुर बुढा) सहित तीन जनाको धरौटी रकम घटाइएको छ। सर्वोच्च अदालतले यसअघि तोकिएको धरौटी रकम बढी भएको भन्दै पुनः आदेश गर्न निर्देशन दिएपछि काठमाडौं जिल्ला प्रशासन कार्यालयले धरौटी आधा घटाएको हो।

काठमाडौंका प्रमुख जिल्ला अधिकारी ईश्वरराज पौडेलका अनुसार मंगलबार बुढासहित प्रकाश बम र सुनिल विकको धरौटी ५० हजार रुपैयाँका दरले तोकिएको छ।

यसअघि सार्वजनिक शान्तिविरुद्धको कसुरमा उनीहरूलाई एक लाख रुपैयाँका दरले धरौटी तोकिएको थियो। तर, उक्त रकम बुझाउन नसकेपछि उनीहरूलाई कारागार चलान गरिएको थियो।

धरौटी रकम बढी भएको भन्दै उनीहरू बन्दी प्रत्यक्षीकरणको निवेदन लिएर सर्वोच्च अदालत पुगेका थिए। साउन २० गते काठमाडौं प्रशासनले धरौटी माग गरेको थियो।

धरौटी बुझाउन नसकेपछि थुनामा रहेका उनीहरूको विषयमा सोमबार न्यायाधीश शारंगा सुवेदी र टेकप्रसाद ढुंगानाको इजलासले काठमाडौं प्रशासनको यसअघिको आदेश बदर गरेको थियो। सर्वोच्चले पुर्पक्षसम्बन्धी आदेश पुनः गर्न निर्देशन दिएपछि मंगलबार काठमाडौं प्रशासनमा पुनः सुनुवाइ भएको हो।

धरौटी बुझाउन बाँकी

प्रशासनले मंगलबार धरौटी रकम घटाएर ५० हजार रुपैयाँ कायम गरे पनि उनीहरूले अझै धरौटी बुझाएका छैनन्।

धरौटी रकम बुझाउन नसकेका कारण अजय सोडारीसहित तीनै जना अझै कारागारमै थुनामा रहेका छन्।

Originally published on abcnews.com.np.