काठमाडौं । नेपाल सरकारको निशान छाप अनधिकृत रूपमा प्रयोग गरी जीपीएस ट्र्याकर बिक्री गरेको आरोपमा प्रहरीले एक जनालाई पक्राउ गरेको छ।

काठमाडौं उपत्यका अपराध अनुसन्धान कार्यालयले पत्रकार सम्मेलनमार्फत दिएको जानकारीअनुसार पक्राउ पर्नेमा रौतहटको चन्द्रपुर नगरपालिका–२ घर भई काठमाडौं महानगरपालिका–२२ बस्ने २९ वर्षीय दीपेन्द्र कर्माचार्य रहेका छन्। उनलाई टेवहालबाट पक्राउ गरिएको हो।

प्रहरीका अनुसार कर्माचार्यले नेपाल सरकारको स्वीकृति नलिई आर्थिक लाभ लिने उद्देश्यले सर्वसाधारणलाई झुक्याउँदै आफूले बिक्री गर्ने जीपीएस ट्र्याकर डिभाइस नेपाल सरकारबाट मान्यता प्राप्त भएको गलत प्रचार गर्दै आएका थिए।

प्रारम्भिक अनुसन्धानमा चीनबाट आयात गरिएका जीपीएस ट्र्याकरमा नेपाल सरकारको निशान छाप राखेर बिक्री तथा वितरण गर्ने गरेको खुलेको प्रहरीले जनाएको छ।

प्रहरीले कर्माचार्यको साथबाट निशान छाप अंकित ५२ थान जीपीएस ट्र्याकर डिभाइस बरामद गरेको छ।

प्रहरी उपरीक्षक रामेश्वर कार्कीका अनुसार पक्राउ परेका कर्माचार्यलाई थप अनुसन्धान तथा आवश्यक कारबाहीका लागि जिल्ला प्रहरी परिसर काठमाडौं पठाइएको छ।

Originally published on abcnews.com.np.