काठमाडौँ । लगातार पाँच दिनसम्म तीव्र वृद्धि भएको सुनको मूल्यमा आज सामान्य गिरावट आएको छ। नेपाल सुनचाँदी व्यवसायी महासंघका अनुसार बुधबार सुनको मूल्य प्रतितोला १ हजार २ सय रुपैयाँले घटेर ३ लाख ६ हजार ७ सय रुपैयाँ कायम भएको छ।

यसअघि लगातार पाँच दिनमा सुनको मूल्य प्रतितोला २४ हजार २ सय रुपैयाँले बढेको थियो। मंगलबार मात्रै सुनको भाउ ६ हजार ४ सय रुपैयाँले बढेर प्रतितोला ३ लाख ७ हजार ९ सय रुपैयाँ पुगेको थियो।

पाँच दिनको तीव्र वृद्धिपछि आएको आजको गिरावटलाई सुनको मूल्यमा देखिएको सामान्य करेक्सनका रूपमा हेरिएको छ।

चाँदीको मूल्य पनि घट्यो

सुनसँगै चाँदीको मूल्यमा पनि गिरावट आएको छ। महासंघका अनुसार आज चाँदी प्रतितोला ३५ रुपैयाँले घटेर ४ हजार ७ सय ४५ रुपैयाँमा कारोबार भइरहेको छ।

यसअघि चाँदीको मूल्यमा पनि उल्लेख्य उतारचढाव देखिँदै आएको थियो।

सुनको उच्चतम मूल्य ३ लाख ३९ हजार ३ सय

नेपाली बजारमा सुनको हालसम्मकै उच्च मूल्य भने गत माघ १५ गते कायम भएको थियो। त्यस दिन सुनको मूल्य प्रतितोला २० हजार ५ सय रुपैयाँले बढेर ३ लाख ३९ हजार ३ सय रुपैयाँ पुगेको थियो।

त्यस्तै, चाँदीको हालसम्मकै उच्च मूल्य गत माघ १५ गते प्रतितोला ७ हजार ५ सय ५ रुपैयाँ पुगेको थियो। त्यसको भोलिपल्ट अर्थात् माघ १८ गते चाँदीको मूल्य प्रतितोला १ हजार ५ सय ६५ रुपैयाँले घटेको थियो।

पछिल्लो समय अन्तर्राष्ट्रिय बजारमा देखिएको उतारचढावसँगै नेपाली बजारमा पनि सुनचाँदीको मूल्यमा तीव्र परिवर्तन हुँदै आएको छ।

Originally published on abcnews.com.np.