काठमाडौं । नेपाली कांग्रेसका प्रवक्ता देवराज चालिसेले प्रधानमन्त्री वालेन्द्र शाह (बालेन)का पछिल्ला कूटनीतिक गतिविधिलाई ‘स्टन्ट’को संज्ञा दिएका छन्।

प्रधानमन्त्री शाहले भारतीय र चिनियाँ राजदूतसँग छुट्टाछुट्टै भेट गरेको विषयलाई लक्षित गर्दै चालिसेले यस्तो टिप्पणी गरेका हुन्। उनले प्रधानमन्त्रीले यसअघि सामूहिक भेटघाटलाई प्राथमिकता दिने नीति लिएको भए पनि पछिल्लो गतिविधिले आफ्नै कूटनीतिक अभ्यासको उल्लङ्घन गरेको आरोप लगाए।

सामाजिक सञ्जालमार्फत प्रतिक्रिया दिँदै चालिसेले प्रधानमन्त्रीको पछिल्लो कदम न नियमअनुसार, न कूटनीतिक चातुर्य र न देशहितसँग जोडिएको भन्दै प्रश्न उठाएका छन्। उनले राजनीतिमा चर्चित ‘स्टन्ट’ अब कूटनीतिक क्षेत्रमा समेत विस्तार हुन थालेको टिप्पणी गरेका छन्।

आफ्नै कूटनीतिक नीति तोडेको आरोप

चालिसेले प्रधानमन्त्री शाहले आफैँ सुरु गरेको ‘सेल्फ रिष्ट्रिक्सन डिप्लोमेसी’ अर्थात् आत्मसंयमको कूटनीति आफैँले तोडेको आरोप लगाए।

उनका अनुसार करिब चार महिनाअघि भारतीय विदेशमन्त्री विक्रम मिश्रीलाई छुट्टै भेट नदिने भएपछि उनको नेपाल भ्रमण रद्द भएको थियो। त्यस्तै, अमेरिकी राष्ट्रपतिका विशेषदूत सर्जिओ गोर र अमेरिकी उपविदेशमन्त्री सारा वी. रोजर्सले समेत प्रधानमन्त्रीको सोही कूटनीतिक नीतिका कारण भेट नपाएको चालिसेको दाबी छ।

विदेश नीति कसले चलाइरहेको छ ?

कांग्रेस प्रवक्ता चालिसेले राष्ट्रिय स्वतन्त्र पार्टीका सभापति रवि लामिछाने तथा प्रधानमन्त्रीका विशेषदूतले भारत पुगेर उच्च अधिकारीसँग भेटघाट गरेको विषय पनि उठाएका छन्।

प्रधानमन्त्रीले सामूहिक भेटघाटलाई प्राथमिकता दिने बताउँदै आएका बेला आफैँले भारतीय र चिनियाँ राजदूतसँग एक्लाएक्लै भेट गर्नु रणनीतिक उपलब्धि नभएको उनको टिप्पणी छ।

चालिसेले नेपालको विदेश नीति राज्यले, सरकारको संस्थागत संयन्त्रले, प्रधानमन्त्रीको व्यक्तिगत शैलीले वा सत्तारूढ दलको राजनीतिक कूटनीतिले सञ्चालन गरिरहेको हो भन्ने प्रश्नसमेत उठाएका छन्।

Originally published on abcnews.com.np.