बागलुङ । बागलुङको काठेखोला गाउँपालिका–३ धम्जामा धारिलो चक्कु प्रहार गरी साथीको हत्या गरेको आरोपमा एक युवक पक्राउ परेका छन्।

प्रहरीले ढोरपाटन नगरपालिका–५ का २५ वर्षीय अर्जुन घर्तीलाई मंगलबार राति पक्राउ गरेको हो। जिल्ला प्रहरी कार्यालय बागलुङका डिएसपी रामेश्वर त्वातीका अनुसार घटनाको सूचना प्राप्त भएलगत्तै खटिएको प्रहरी टोलीले घर्तीलाई नियन्त्रणमा लिएको हो।

ज्याला मजदुरी गर्न आएका थिए

प्रहरीका अनुसार मंगलबार राति पौने १० बजे घर्तीले आफ्नै छिमेकी ४० वर्षीय अशोक खत्रीलाई धारिलो चक्कु प्रहार गरेका थिए। गम्भीर घाइते खत्रीको घटनास्थलमै मृत्यु भएको प्रहरीले जनाएको छ।

घर्ती र खत्री दुवै ढोरपाटन नगरपालिका–५ का बासिन्दा हुन्। उनीहरू करिब एक साताअघि काठेखोला गाउँपालिकामा ज्याला मजदुरी गर्न आएका थिए।

उनीहरू निर्मल आधारभूत विद्यालयको पुरानो भवनमा बस्दै आएका थिए। सोही भवनमा खत्रीमाथि चक्कु प्रहार भएको प्रहरीले जनाएको छ।

हत्याको कारण खुल्न बाँकी

प्रहरीले घटनाबारे विस्तृत अनुसन्धान अघि बढाएको छ। डिएसपी त्वातीका अनुसार हत्याको कारण भने अहिलेसम्म खुल्न सकेको छैन।

प्रहरीले घटनास्थलबाट आवश्यक प्रमाण संकलन गर्नुका साथै घटनामा संलग्न व्यक्तिमाथि थप अनुसन्धान गरिरहेको जनाएको छ।

Originally published on abcnews.com.np.