काठमाडौँ । राष्ट्रिय स्वतन्त्र पार्टी (रास्वपा)का सांसद खगेन्द्र सुनुवारले निर्वाचन प्रहरीको पोसाक खरिद प्रक्रियामा भएको भनिएको अनियमितताबारे छानबिन गर्न छुट्टै समिति गठन गर्न माग गरेका छन्।

लेखा समितिको बैठकमा बोल्दै सांसद सुनुवारले पोसाक खरिद प्रक्रियामा उठेका प्रश्नबारे निष्पक्ष र गहिरो अनुसन्धान आवश्यक रहेको बताए।

उनले छानबिन समिति गठन भएपछि गृहसचिव राजकुमार श्रेष्ठ र प्रहरी महानिरीक्षक दानबहादुर कार्कीलाई जिम्मेवारीबाट अलग गरेर छानबिनको दायरामा ल्याउनुपर्ने धारणा राखे।

“तत्कालै छानबिन समिति बन्नुपर्छ,” उनले भने, “छानबिन समिति बनेपछि गृहसचिव र आईजीपीलाई जिम्मेवारीबाट निकालेर कठघरामा उभ्याउनुपर्छ।”

सांसद सुनुवारले फागुन २१ गते भएको निर्वाचनका क्रममा गृहमन्त्रीको जिम्मेवारी सम्हालेका ओमप्रकाश अर्याल र तत्कालीन सशस्त्र प्रहरी प्रमुख राजु अर्याललाई समेत तत्काल छलफलका लागि बोलाउनुपर्ने माग गरे।

पोसाक खरिदका क्रममा व्यापारी छनोटमा मिलेमतो भएको आरोपसहित उजुरी परेको भन्दै उनले त्यसबारे थप अनुसन्धान आवश्यक रहेको बताए।

उजुरीमाथि समितिमा छलफल

सांसद सुनुवारले गृहमन्त्रीसहित सम्बन्धित अधिकारीहरूको सम्भावित संलग्नताबारे समेत छानबिन गर्नुपर्ने बताए। उजुरीमा उठाइएका विषयको सत्यतथ्य पत्ता लगाउन थप प्रमाण र विवरण संकलन गर्नुपर्ने उनको भनाइ छ।

हाल निर्वाचन प्रहरीको पोसाक खरिदसम्बन्धी उजुरीमाथि लेखा समितिमा छलफल भइरहेको छ।

यसअघि प्रहरी महानिरीक्षक दानबहादुर कार्कीले समेत पोसाक खरिदसम्बन्धी उजुरीबारे तत्काल छानबिन गर्नुपर्ने धारणा राखेका थिए।

पोसाक खरिद प्रक्रियामा अनियमितता भएको हो वा होइन भन्ने विषयमा छानबिन अघि बढेपछि मात्रै वास्तविकता स्पष्ट हुने देखिएको छ।

Originally published on abcnews.com.np.