धनुषा । जिल्ला अदालत धनुषाको गेटमा एक महिलाले आत्मदाहको प्रयास गरेकी छन्।
बुधबार दिउँसो जनकपुरधाम उपमहानगरपालिका–३ की ५५ वर्षीया फूलकुमारी रजकले शरीरमा पेट्रोल खन्याएर आत्मदाहको प्रयास गरेकी हुन्। घटनास्थलमा रहेका प्रहरीले तत्काल हस्तक्षेप गरी उनलाई जोगाएको जिल्ला प्रहरी कार्यालय धनुषाले जनाएको छ।
प्रहरी निरीक्षक अरविन्द साहका अनुसार प्रहरी टोलीले रजकलाई तत्काल उद्धार गरेको हो।
जिल्ला अदालतमा मिटरब्याजसम्बन्धी मुद्दामा हरेराम साह र गोपाल साहविरुद्ध थुनछेक बहस चलिरहेका बेला पीडितहरूले उनीहरूलाई थुनामा राख्नुपर्ने माग गर्दै प्रदर्शन गरिरहेका थिए। सोही क्रममा रजकले आत्मदाहको प्रयास गरेको प्रहरीले जनाएको छ।
घटनापछि जिल्ला अदालत परिसर आसपासको सुरक्षा व्यवस्था कडा पारिएको छ।
Originally published on abcnews.com.np.
प्रतिक्रिया दिनुहोस्