काठमाडौं । सरकारले देशभरका सरकारी कार्यालयमा सेवाग्राहीले पेश गर्ने निवेदनको ढाँचामा एकरूपता ल्याएको छ । प्रधानमन्त्री तथा मन्त्रिपरिषद्को कार्यालयले ‘सरकारी कार्यालयमा प्रयोग हुने निवेदनको ढाँचा तथा सोको कार्यान्वयन मार्गदर्शन, २०८३’ स्वीकृत गर्दै बुधबारदेखि कार्यान्वयनका लागि निर्देशन दिएको हो ।

मार्गदर्शनअनुसार सरकारी सेवा लिन पेश गरिने निवेदन देशभर एउटै निश्चित ढाँचामा हुनेछ । यसबाट कार्यालयअनुसार फरक–फरक निवेदन लेख्नुपर्ने र सेवाग्राहीमा हुने अन्योल हट्ने तथा सार्वजनिक सेवा प्रवाह थप सरल, सहज र नागरिकमैत्री हुने सरकारको अपेक्षा छ ।

परम्परागत कागजी निवेदनलाई क्रमशः डिजिटल माध्यममा समेत रूपान्तरण गरिने जनाइएको छ । यसले भविष्यमा सरकारी सेवा अनलाइन तथा मोबाइल एपमार्फत लिन सहज हुने आधार तयार गर्नेछ । मार्गदर्शनको प्रभावकारी कार्यान्वयनको जिम्मेवारी सम्बन्धित कार्यालय प्रमुखलाई दिइएको छ ।

Originally published on abcnews.com.np.