काठमाडौं । नेपाल सिमेन्ट उत्पादनमा आत्मनिर्भर हुँदै निर्यातको सम्भावनासम्म पुगे पनि फलाम, तामा, डोलोमाइटलगायत खनिजमा त्यस्तै उपलब्धि हासिल गर्न नसकेको भन्दै सांसद लिमा अधिकारीले प्रश्न उठाएकी छन् ।

राष्ट्रिय प्राकृतिक स्रोत तथा वित्त आयोगसँगको छलफलमा उनले नेपालमा ६० भन्दा बढी प्रकारका खनिज पहिचान भइसकेको र एक हजारभन्दा बढी स्थानमा खनिज स्रोत भेटिए पनि खानी क्षेत्रको अर्थतन्त्रमा योगदान ०.५ प्रतिशतभन्दा माथि उठ्न नसकेको बताइन् । उनका अनुसार खनिजको अभावभन्दा पनि नीतिगत जटिलता, अनुमति प्रक्रियामा ढिलाइ, धेरै निकायबाट स्वीकृति लिनुपर्ने अवस्था र पूर्वाधारको कमी मुख्य समस्या हुन् ।

अधिकारीले सिमेन्ट क्षेत्रमा जस्तै अन्य खनिजको उत्खनन तथा प्रशोधनमा निजी क्षेत्रलाई आकर्षित गर्न सडक, विद्युत् र प्रशोधन उद्योगलगायत पूर्वाधारमा लगानी बढाउनुपर्ने बताइन् । उनले वन क्षेत्रको उपयोग, काठ आयात, खानी तथा पूर्वाधार आयोजनामा स्वीकृति प्रक्रियाको झन्झट र ईआईए/आईईई प्रक्रियालाई समयबद्ध बनाउनुपर्ने विषयमा समेत आयोगसँग समाधान मागेकी छन् ।

आयोगले खानी क्षेत्रमा लगानी बढाउने सम्भावना र देखिएका समस्याबारे अध्ययन तथा निष्कर्ष सार्वजनिक गर्ने तयारी गरिरहेको जनाएको छ ।

Originally published on abcnews.com.np.