पर्वत । पर्वत जेसीजको आयोजनामा हुन लागेको दोस्रो पर्वत जेसीज कप सेभेन ए साइड फुटबल प्रतियोगितामा २७ टोलीले प्रतिस्पर्धा गर्ने भएका छन्।

साउन २८ देखि ३१ गतेसम्म सदरमुकाम कुश्मास्थित बडागाउँचौर खेल मैदानमा प्रतियोगिता सञ्चालन हुनेछ। पर्वत जेसीजकी अध्यक्ष शर्मिला शर्माका अनुसार प्रतियोगितामा जिल्लाका विभिन्न क्लब तथा संस्थासहित गण्डकी प्रदेश प्रहरीको टोलीसमेत सहभागी हुँदैछ।

प्रतियोगिताको विजेताले १ लाख ११ हजार १ सय ११ रुपैयाँ नगदसहित ट्रफी, मेडल र प्रमाणपत्र प्राप्त गर्नेछ। उपविजेताले ५५ हजार ५ सय ५५ रुपैयाँ नगदसहित ट्रफी, मेडल र प्रमाणपत्र पाउनेछ।

व्यक्तिगत विधातर्फ उत्कृष्ट खेलाडी, उत्कृष्ट डिफेन्डर, हाइ स्कोरर, राइजिङ प्लेयर, उत्कृष्ट मिडफिल्डर र उत्कृष्ट गोलकिपरलाई समेत पुरस्कृत गरिनेछ। प्रत्येक खेलमा ‘म्यान अफ द म्याच’ घोषित खेलाडीलाई पनि पुरस्कार प्रदान गरिने आयोजकले जनाएको छ।

खेलसँगै वृक्षरोपण

पर्वत जेसीजले सन् २०२६ का लागि अघि सारेको ‘वन टिम : वन भिजन’ नाराअनुसार प्रतियोगिता आयोजना गर्न लागिएको हो। खेलकुदको क्षेत्रमा योगदान पुर्‍याउनुका साथै पर्वत तथा आसपासको क्षेत्रमा विशेषगरी फुटबल विकासका सम्भावना पहिचान गर्ने उद्देश्य रहेको अध्यक्ष शर्माले बताइन्।

प्रतियोगितालाई वातावरणमैत्री र सन्देशमूलक बनाउन प्रत्येक गोल भएको अवसरमा एउटा वृक्षरोपण गरिने आयोजकले जनाएको छ।

प्रतियोगिताका संयोजक अन्जोल कर्माचार्यले जेसीज तथा गैरजेसीज क्लब र संस्थाबीच आपसी सम्बन्ध विस्तार गर्न प्रतियोगिताले सहयोग पुग्ने बताए। पर्वत जेसीजका गतिविधिलाई जिल्लामा मात्र सीमित नराखी अन्य जिल्लाका जेसीज तथा विभिन्न संघसंस्था र क्लबहरूसँग जोड्न पनि प्रतियोगिता महत्वपूर्ण हुने उनको भनाइ छ।

गत वर्ष आयोजित पहिलो संस्करणमा १९ टोली सहभागी भएका थिए। उक्त प्रतियोगिताको उपाधि पोखराको ‘होटेल बेन्जु’ले जितेको थियो।

Originally published on abcnews.com.np.