सर्लाही । सर्लाहीको ब्रह्मपुरी गाउँपालिका–२ स्थित राजदेवी मन्दिर अगाडिबाट स्रोत नखुलेको ५१ लाख ३४ हजार रुपैयाँसहित एक जना पक्राउ परेका छन्।

जिल्ला प्रहरी कार्यालय सर्लाहीबाट खटिएको प्रहरी टोलीले भेल्हीबाट बयलबासतर्फ जाँदै गरेको ज १० प ८६५२ नम्बरको स्कुटर रोकेर जाँच गर्ने क्रममा उक्त रकम बरामद गरेको हो।

प्रहरीका अनुसार स्कुटरको डिकी, अगाडिको फुटबोर्ड तथा चालकले बोकेको कालो झोलाभित्र लुकाइछिपाइ राखिएको अवस्थामा रकम फेला परेको थियो।

बरामद रकममा एक हजार रुपैयाँ दरका ३ हजार ५ सय थान, पाँच सय रुपैयाँ दरका ३ हजार १०८ थान, एक सय रुपैयाँ दरका ७ सय थान र ५० रुपैयाँ दरका २ सय थान नोट रहेका छन्।

प्रहरीले नियन्त्रणमा लिन खोज्ने क्रममा स्कुटर अनियन्त्रित भई दुर्घटना हुँदा चालक महोत्तरीको गौशाला नगरपालिका–१२ का ५७ वर्षीय जगन्नाथ महतो कोइरी घाइते भएका छन्।

प्रहरीका अनुसार कोइरीको प्रादेशिक अस्पताल मलङ्गवामा सामान्य उपचारपछि थप उपचारका लागि म्याक्स अस्पताल मलङ्गवा लगिएको थियो। उनको अवस्था हाल सामान्य रहेको प्रहरीले जनाएको छ।

नियन्त्रणमा लिने क्रममा जिल्ला प्रहरी कार्यालय सर्लाहीका प्रहरी सहायक हवल्दार राजेशकुमार यादव र प्रहरी जवान रामचन्द्र यादव पनि सामान्य घाइते भएका छन्। उनीहरूको प्रादेशिक अस्पताल मलङ्गवामा उपचारपछि डिस्चार्ज भइसकेको प्रहरीले जनाएको छ।

प्रहरीले बरामद रकम, स्कुटर र पक्राउ परेका कोइरीलाई नियन्त्रणमा राखेर घटनाबारे थप अनुसन्धान गरिरहेको जनाएको छ।

रकमको स्रोत तथा ओसारपसारको उद्देश्यबारे अनुसन्धान भइरहेको जिल्ला प्रहरी कार्यालय सर्लाहीले जनाएको छ।

Originally published on abcnews.com.np.