काठमाडौँ । नेपाली कांग्रेसको संस्थापन इतर पक्षले आयोजना गर्न लागेको राष्ट्रिय भेलामा करिब ४ हजार ५ सय प्रतिनिधि सहभागी हुने भएका छन्।

कांग्रेस नेता डा. शशांक कोइराला नेतृत्वको समितिले साउन २९ देखि ३१ गतेसम्म राष्ट्रिय भेला आयोजना गर्दैछ। प्रचार–प्रसार उपसमितिका संयोजक मीन विश्वकर्माका अनुसार भेलाको सम्पूर्ण तयारी पूरा भएको छ।

भेलाको उद्घाटन साउन २९ गते दिउँसो १ बजे सुकेधारास्थित मिराकल पार्टी प्यालेसमा हुनेछ। आयोजकका अनुसार सहभागीका लागि तोकिएको मापदण्डका आधारमा देशभरबाट करिब ४ हजार ५ सय प्रतिनिधि सहभागी हुनेछन्।

पहिलो दिन उद्घाटन सत्र सञ्चालन हुनेछ भने दोस्रो दिन बन्द सत्र हुनेछ। बन्द सत्र बिहान ९ बजेदेखि दिउँसो १२ बजेसम्म सञ्चालन गर्ने कार्यतालिका छ। त्यसपछि खाना खाएपछि दिउँसो १ बजेदेखि पुनः बन्द सत्र सुरु हुनेछ।

भेलामा कांग्रेसको वर्तमान अवस्था, संगठन सुदृढीकरण तथा आगामी राजनीतिक गतिविधिका विषयमा छलफल हुने बताइएको छ।

Originally published on abcnews.com.np.