काठमाडौँ । साताको कारोबारको चौथो दिन बुधबार नेपाली सेयर बजारमा सामान्य वृद्धि भएको छ। नेपाल स्टक एक्सचेन्ज (नेप्से) परिसूचक ०.५५ अंकले बढेर बजार बन्द भएको हो।

नेप्सेमा सामान्य वृद्धि भए पनि कारोबार रकम भने ३ अर्ब ५३ करोड रुपैयाँ पुगेको छ।

नेप्सेका अनुसार बुधबार १०२ वटा कम्पनीको सेयर मूल्य बढेको छ भने १६५ वटा कम्पनीको मूल्य घटेको छ। त्यस्तै ९ वटा कम्पनीको सेयर मूल्य स्थिर रहेको छ।

यस दिन माउन्ट एभरेस्ट पावर डेभलपमेन्ट कम्पनीको सेयर मूल्य सर्वाधिक १५ प्रतिशतले बढेको छ। अन्य बढ्ने कम्पनीको सेयर मूल्य भने अधिकतम ५.४८ प्रतिशतसम्म उकालो लागेको छ।

यता आईसीएफसी फाइनान्सको ऋणपत्रको मूल्य सर्वाधिक १५ प्रतिशतले घटेको छ। अपर लोहोरे खोला हाइड्रोपावरको सेयर मूल्य पनि १४.९८ प्रतिशतले घटेको छ।

कारोबार रकमका आधारमा एनआरएन इन्फ्रास्ट्रक्चर एन्ड डेभलपमेन्ट लिमिटेड अग्रस्थानमा रहेको छ। कम्पनीको बुधबार करिब ३१ करोड रुपैयाँ बराबरको सेयर कारोबार भएको छ।

उपसमूहतर्फ वाणिज्य बैंक, फाइनान्स, होटल तथा पर्यटन, लगानी र सामूहिक लगानी कोष समूहको परिसूचक बढेको छ। बाँकी अधिकांश समूहका परिसूचक भने घटेका छन्।

समग्रमा कारोबार अवधिभर बजारमा खरिद र बिक्री चापबीच सन्तुलन देखिँदा नेप्से परिसूचकमा सामान्य मात्रै वृद्धि भएको छ।

Originally published on abcnews.com.np.