सर्लाही । अन्तर्राष्ट्रिय युवा दिवसको अवसरमा सर्लाहीको हरिवनमा लागूऔषधविरुद्ध युवा दौड प्रतियोगिता आयोजना गरिएको छ।

सर्लाही युथ फोरमको आयोजनामा बुधबार बिहान भएको प्रतियोगितामा एक सयभन्दा बढी युवाको सहभागिता रहेको थियो। ‘लागूऔषधविरुद्ध हाम्रो दौड’ नारासहित नयाँरोडदेखि हरिवनसम्म दौड आयोजना गरिएको हो।

प्रतियोगितामा अशोककुमार साह प्रथम, विक्रम यादव दोस्रो र आकाश मुखिया तेस्रो भएका छन्। विजेताले क्रमशः ७ हजार, ५ हजार र ३ हजार रुपैयाँ नगद पुरस्कारसहित प्रमाणपत्र प्राप्त गरेका छन्।

सर्लाहीमा पछिल्लो समय लागूऔषध सेवनको समस्या बढ्दै गएको भन्दै युवामा जनचेतना अभिवृद्धि गर्ने उद्देश्यले कार्यक्रम आयोजना गरिएको फोरमकी अध्यक्ष आरती लामाले बताइन्।

उनले लागूऔषधका कारण युवाको सिर्जनशीलता प्रभावित भइरहेको भन्दै युवालाई स्वस्थ, अनुशासित तथा मानसिक र शारीरिक रूपमा सक्षम बनाउन राज्यले विशेष ध्यान दिनुपर्ने बताइन्।

यसैबीच, अगस्ट १२ अर्थात् आज अन्तर्राष्ट्रिय युवा दिवस नेपालमा पनि विभिन्न कार्यक्रम गरी मनाइएको छ। यस वर्षको मूल नारा ‘भिन्न परिवेश, साझा आकाङ्क्षा’ तय गरिएको छ।

युवाको भूमिका र महत्वलाई उजागर गर्ने उद्देश्यले संयुक्त राष्ट्रसंघको आह्वानमा सन् २००० देखि हरेक वर्ष अगस्ट १२ मा अन्तर्राष्ट्रिय युवा दिवस मनाइँदै आएको छ।

Originally published on abcnews.com.np.