काठमाडौं । सत्तारूढ दलका सांसद खगेन्द्र सुनारले नेपाल प्रहरीका लागि जुत्ता, मोजा, कपडालगायत सामग्री खरिदमा भएको भनिएको अनियमितताबारे तत्काल छानबिन समिति गठन गर्न माग गर्नुभएको छ ।

लेखा समितिको बैठकमा बोल्दै सांसद सुनारले प्रहरी महानिरीक्षक (आईजीपी) माथिसमेत प्रश्न उठिसकेको अवस्थामा उहाँलाई पदमै राखेर छानबिन गर्नु उचित नहुने बताउनुभयो ।

उहाँले आरोपित व्यक्तिलाई जिम्मेवारीबाट अलग गरेर निष्पक्ष छानबिन गर्नुपर्ने माग गर्नुभयो । “तत्काल छानबिन समिति बनाउनुपर्छ, आरोपित मानिसहरूलाई जिम्मेवारीबाट बाहिर राख्नुपर्छ र निष्पक्ष ढङ्गले छानबिन गरिनुपर्छ,” उहाँले भन्नुभयो ।

प्रहरीका लागि खरिद गरिने जुत्ता, मोजा, कपडा तथा अन्य सामग्रीमा अनियमितता हुँदा त्यसको प्रत्यक्ष असर गरिब तथा निम्न वर्गबाट भर्ती भएका प्रहरी र म्यादी प्रहरीमाथि पर्ने उहाँको भनाइ थियो ।

निर्वाचनका क्रममा ठूलो सङ्ख्यामा म्यादी प्रहरी भर्ती हुने भएकाले उनीहरूले दुःख गरेर कमाएको पारिश्रमिकमा समेत बदमासी गर्न नहुने सांसद सुनारले बताउनुभयो ।

उहाँले ठेकेदार छनोट प्रक्रियामै अनियमितता भएको हुन सक्ने आशङ्का व्यक्त गर्दै प्रहरी सङ्गठन र ठेकेदारबीचको सम्भावित सम्बन्ध तथा मिलेमतोबारे पनि छानबिन गर्नुपर्ने बताउनुभयो । जिल्लास्तरमा प्रहरीका लागि सामान खरिद गर्दा प्रहरीका बहालवाला तथा पूर्वकर्मचारीसँग ठेकेदारको सम्बन्ध भए–नभएकोसमेत अध्ययन गर्नुपर्ने उहाँको माग छ ।

प्रहरी खरिदसम्बन्धी उजुरी अख्तियार दुरुपयोग अनुसन्धान आयोगलगायत निकायमा परेको विषयमा निष्पक्ष छानबिन हुनुपर्ने उहाँले बताउनुभयो । तत्कालीन गृहमन्त्री, गृहसचिव र प्रहरी महानिरीक्षकलाई जिम्मेवारीबाट अलग गरी छानबिन गर्नुपर्ने मागसमेत उहाँले राख्नुभयो ।

“आरोप लागेका व्यक्ति पदमै बसेर आफूविरुद्धको छानबिनमा प्रभाव पार्न सक्छन् । बर्दी लाएर बसेर ‘ल, मलाई छानबिन गर’ भन्न पाइँदैन,” उहाँले भन्नुभयो ।

सम्बन्धित ठेकेदार र प्रहरी अधिकारीबीच भएको हुन सक्ने सम्पर्क तथा आर्थिक कारोबारसमेत अनुसन्धानको दायरामा ल्याउनुपर्ने सांसद सुनारको माग छ । आवश्यक परे सम्बन्धित व्यक्तिका मोबाइल तथा अन्य प्रमाण नियन्त्रणमा लिएर फौजदारी कसुरको कोणबाट समेत अनुसन्धान गर्नुपर्ने उहाँले बताउनुभयो ।

Originally published on abcnews.com.np.