पोखरा । पोखरा–मुग्लिन सडक विस्तार आयोजनाअन्तर्गत पोखराको सेती नदीमा निर्माणाधीन ‘सिग्नेचर’ पुलको भौतिक प्रगति ७० प्रतिशत पुगेको छ। सुरुमा निर्माण कार्यमा केही ढिलाइ भए पनि पछिल्लो समय कामले गति लिएको आयोजना कार्यालयले जनाएको छ।

विसं २०७९ साउनमा ठेक्का सम्झौता भएको पुल निर्माणका लागि पछिल्लो पटक थपिएको म्याद आगामी फागुनसम्म रहेको छ। निर्धारित समयभित्रै काम सम्पन्न गर्ने गरी निर्माण कम्पनीलाई सहजीकरण भइरहेको आयोजना कार्यालयले जनाएको छ।

आयोजनाको पश्चिम खण्डका प्रमुख इन्जिनियर कृष्णबहादुर कुँवरका अनुसार अहिले पुलको डाउनस्ट्रिमतर्फ टावर निर्माण तथा पाइप जडानको काम भइरहेको छ। बिहीबारदेखि स्ल्याब ढलान सुरु गर्ने तयारी गरिएको छ। पुलमा रहेका चारवटै टावरको करिब ७५ प्रतिशत काम सम्पन्न भइसकेको उनले जानकारी दिए।

डाउनस्ट्रिमतर्फको ढलानपछि अपस्ट्रिमतर्फ टावर निर्माण र पाइप जडानको काम अघि बढाइनेछ। गत जेठमा पूर्वाधार विकासमन्त्री सुनिल लम्सालले निर्माणाधीन पुलको निरीक्षण गरी निर्धारित समयमै काम सम्पन्न गर्न आयोजना कार्यालय र निर्माण कम्पनीलाई निर्देशन दिएका थिए।

९४ करोडको लागतमा निर्माण

भ्याटबाहेक ९४ करोड रुपैयाँको ठेक्कामा रसुवा कन्स्ट्रक्सनले पुल निर्माण गरिरहेको छ। ‘केबल–स्टेड’ प्रविधिमा निर्माण भइरहेको पुलका लागि आवश्यक केबललगायत सामग्री विदेशबाट ल्याउनुपर्ने तथा मापदण्डभित्रका संरचना समयमा हटाउन नसक्दा यसअघि निर्माण कार्य प्रभावित भएको थियो।

एसियाली विकास बैंकको ऋण सहयोगमा सडक विभागमार्फत निर्माण भइरहेको यो पुल १९० मिटर लामो हुनेछ। निर्माणमा कङ्क्रिट र फलामको प्रयोग गरिएको छ। पुलको डिजाइन विदेशी प्राविधिकसहितको टोलीले तयार गरेको आयोजना कार्यालयले जनाएको छ।

पोखरा–मुग्लिन सडकमा दुई सिग्नेचर पुल

छ लेनको सडकअन्तर्गत हाल सञ्चालनमा रहेको चाइना पुलको तल र माथि गरी दुईवटा आकर्षक ‘सिग्नेचर’ पुल निर्माण गरिने योजना छ। नयाँ प्रविधि र आकर्षक डिजाइनमा निर्माण हुने पुलले पर्यटकीय राजधानी पोखराको सौन्दर्य थप बढाउने अपेक्षा गरिएको छ।

पोखरा–मुग्लिन सडक विस्तार तथा स्तरोन्नति आयोजनाअन्तर्गत पोखराको सेती नदीसँगै तनहुँको मादी नदीमा पनि सिग्नेचर पुल निर्माणाधीन अवस्थामा छन्।

Originally published on abcnews.com.np.