काठमाडौं । नेपाल कानुन व्यवसायी परिषद्को ३४औँ स्थापना दिवसका अवसरमा कानुन तथा न्याय क्षेत्रमा प्रकाशित पुस्तकमध्ये ‘न्यायिक समितिको सारथी’ उत्कृष्ट पुस्तकका रूपमा पुरस्कृत भएको छ।

बुधबार काठमाडौंमा परिषद्ले आयोजना गरेको कार्यक्रममा रिनोवेसन नेपालद्वारा प्रकाशित तथा अधिवक्ताद्वय उद्धवप्रसाद अधिकारी र रामबाबु नेपालद्वारा लिखित ‘न्यायिक समितिको सारथी’ लाई उत्कृष्ट पुस्तकका रूपमा पुरस्कार प्रदान गरिएको हो।

कार्यक्रममा सर्वोच्च अदालतका प्रधानन्यायाधीश डा. मनोजकुमार शर्माले पुस्तकका लेखकद्वयलाई सम्मानपत्र तथा नगद पुरस्कार प्रदान गरे।

स्थानीय तहमा न्यायिक समितिले गर्ने कार्यसम्पादन, विवाद समाधान तथा मेलमिलाप प्रक्रियालाई प्रभावकारी बनाउन पुस्तकलाई व्यवहारिक कानुनी सन्दर्भग्रन्थका रूपमा तयार गरिएको बताइएको छ।

परिषद्ले आफ्नो स्थापना दिवसका अवसरमा कानुन तथा न्याय क्षेत्रमा प्रकाशित पुस्तकमध्ये उत्कृष्ट कृतिको छनोट गरी पुरस्कार प्रदान गर्दै आएको जनाएको छ। यस वर्ष ‘न्यायिक समितिको सारथी’ उत्कृष्ट ठहरिएपछि लेखकद्वयलाई सम्मान तथा पुरस्कार प्रदान गरिएको हो।

Originally published on abcnews.com.np.