काठमाडौँ । प्रेस काउन्सिल नेपालले आस्था मिडियाका अध्यक्ष तथा जनआस्था साप्ताहिकका सम्पादक किशोर श्रेष्ठलाई पक्राउ गरिएको घटनाप्रति गम्भीर ध्यानाकर्षण जनाएको छ। सञ्चार माध्यमको कार्यालयमा प्रवेश गरी कम्प्युटरलगायत सामग्री जफत गरिएको घटनाप्रति समेत काउन्सिलले चिन्ता व्यक्त गरेको छ।

काउन्सिलका वरिष्ठ प्रशासकीय अधिकृत एवं प्रवक्ता दीपक खनालद्वारा जारी विज्ञप्तिमा श्रेष्ठलाई साउन २७ गते बुधबार राति निजी निवासबाट खानतलासी गरी पक्राउ गरिएको उल्लेख छ। बिहीबार बिहान सञ्चार माध्यमको कार्यालयमा हातहतियारसहित प्रवेश गरी कम्प्युटरलगायत सामग्री जफत गरिएको पनि विज्ञप्तिमा जनाइएको छ।

नागरिकको सूचनाको हक प्रेस स्वतन्त्रताबाटै प्रत्याभूत हुने भन्दै काउन्सिलले प्रेसको मर्यादा कायम राख्नु सबै सरोकारवालाको कर्तव्य भएको जनाएको छ। पत्रकार वा सञ्चार माध्यमबाट आचारसंहिता उल्लङ्घन भएको अवस्थामा काउन्सिलमा उजुरी गर्न सकिने कानुनी व्यवस्था रहेको पनि काउन्सिलले स्मरण गराएको छ।

काउन्सिलले सञ्चारकर्मीलाई सत्य, तथ्य, सन्तुलित र विश्वसनीय पत्रकारिता गर्न आग्रह गरेको छ।

कानुनी प्रक्रियाबाट समाधान गर्न आग्रह

कुनै समाचार वा सञ्चार सामग्रीप्रति चित्त नबुझेमा कानुनी प्रक्रिया अवलम्बन गरी प्रेस काउन्सिल नेपालमा उजुरी दिन सम्बन्धित सबै पक्षलाई काउन्सिलले अनुरोध गरेको छ।

Originally published on abcnews.com.np.