काठमाडौं । रोल्पाको थबाङ गाउँपालिका–५, कोटलबारामा गएको पहिरोमा परी मृत्यु हुनेको संख्या सात पुगेको छ। सशस्त्र प्रहरीका अनुसार पहिरोमा परी पाँच जना अझै बेपत्ता छन् भने उनीहरूको खोजी तथा उद्धार कार्य जारी छ।

पहिरोमा परी सोही ठाउँका २२ वर्षीय हिमाल पुनमगर र २५ वर्षीय सञ्जय घर्तीमगर घाइते भएका छन्। उनीहरूलाई थबाङ स्वास्थ्य चौकीमा प्राथमिक उपचारपछि थप उपचारका लागि बुटवल पठाइएको छ।

मृत्यु हुनेको विवरण

पहिरोमा परी मृत्यु हुनेमा १८ वर्षीया शान्ति पुनमगर, ६५ वर्षीय कमलबहादुर पुनमगर, ४० वर्षीया जुनकुमारी पुनमगर, नौ वर्षीय अशिम पुनमगर, ६ वर्षीय अशोक पुनमगर, ७५ वर्षीय दलबहादुर पुनमगर र ७१ वर्षीया मनरखी पुनमगर रहेका छन्।

मृतकमध्ये एक महिला र दुई पुरुषको शव प्युठानको स्वर्गद्वारी नगरपालिका तथा माण्डवी गाउँपालिका क्षेत्रमा पर्ने माडी खोलाको किनारमा फेला परेको प्रहरीले जनाएको छ।

पाँच जना अझै बेपत्ता

पहिरोमा परी ८० वर्षीय अजम्बर पुनमगर, ७८ वर्षीय बलबहादुर पुनमगर, ७२ वर्षीय लिलबहादुर पुनमगर, ७१ वर्षीया मनि पुनमगर र ६७ वर्षीया हस्तकला पुनमगर बेपत्ता छन्।

बेपत्ताको खोजीका लागि नेपाली सेना, सशस्त्र प्रहरी बल नेपाल र नेपाल प्रहरीको संयुक्त टोली परिचालन गरिएको छ।

लगातार वर्षाले उद्धारमा कठिनाइ

लगातार वर्षाका कारण लेदोसहित पहिरो खस्ने क्रम नरोकिएकाले खोजी तथा उद्धार कार्यमा कठिनाइ भइरहेको प्रहरीले जनाएको छ। घटनास्थलमा पहिरोको जोखिम कायमै रहेकाले उद्धार टोलीले सावधानीपूर्वक खोजी गरिरहेको छ।

बेपत्ता व्यक्तिको खोजीलाई तीव्र बनाउन थप जनशक्ति तथा आवश्यक उपकरण परिचालन गर्नुपर्ने अवस्था रहेको प्रहरीले जनाएको छ।

Originally published on abcnews.com.np.