काठमाडौँ । राष्ट्रियसभाका सदस्यहरूले खाना पकाउने ग्यासको अभाव, कालोबजारी, पत्रकार पक्राउ, हाइड्रोपावर निर्माणबाट उत्पन्न समस्या तथा घरभाडालगायतका विषयमा सरकारको ध्यानाकर्षण गराएका छन्।

राष्ट्रियसभाको आजको बैठकको शून्य समयमा सदस्य विष्णुदेवी पुडासैनीले खाना पकाउने ग्यासको अभावका कारण नागरिकले खाना पकाउनसमेत कठिनाइ भोग्नुपरेको बताउँदै तत्काल समस्या समाधान गर्न सरकारसँग माग गरिन्।

त्यस्तै, सदस्य कृष्णप्रसाद अधिकारीले ग्यासको कृत्रिम अभाव सिर्जना गरिएको भन्दै कालोबजारी नियन्त्रणका लागि प्रभावकारी अनुगमन र कारबाही गर्न सरकारको ध्यानाकर्षण गराए।

पत्रकार पक्राउप्रति आपत्ति

सदस्य घनश्याम रिजालले वरिष्ठ पत्रकार किशोर श्रेष्ठ पक्राउ परेको विषय उठाउँदै उनको तत्काल रिहाइको माग गरे।

सदस्य पदमबहादुर परियारले तनहुँ हाइड्रो निर्माणका क्रममा सेती नदीको बहाव परिवर्तन हुँदा स्थानीय क्षेत्रमा समस्या सिर्जना भएको भन्दै त्यसको समाधान गर्न सरकारसँग आग्रह गरे।

आरोहणमा मृत्यु भएका नेपालीप्रति दुःख

सदस्य रुक्मिणी कोइरालाले पाकिस्तानमा हिमाल आरोहणका क्रममा निधन भएका निर्मल पुर्जासहित छ नेपाली तथा अन्य तीन जनाको मृत्यु भएको घटनाप्रति दुःख व्यक्त गरिन्।

सदस्य रेनु चन्दले कञ्चनपुरका आरक्षपीडितको समस्या समाधानका लागि पटक–पटक आयोग गठन भए पनि समस्या समाधान हुन नसकेको भन्दै सरकारको ध्यानाकर्षण गराइन्।

घरभाडा नीति बनाउन माग

सदस्य विष्णुकुमारी सापकोटाले काठमाडौं उपत्यकामा घर तथा कोठा भाडासम्बन्धी स्पष्ट नीति बनाउन माग गरिन्। उनले घर तथा डेराको भाडा निर्धारणका लागि आवश्यक व्यवस्था गर्न सरकारको ध्यानाकर्षण गराइन्।

त्यस्तै, सदस्य विष्णुबहादुर विश्वकर्माले कालिकोटको नरहरिनाथ गाउँपालिकाका स्थानीयवासीलाई बुधबार विनाकारण धरपकड गरिएको भन्दै आपत्ति जनाए। उनले घटनाबारे छानबिन गरी आवश्यक कदम चाल्न सरकारसँग माग गरे।

Originally published on abcnews.com.np.