काठमाडौं । नेपाल राष्ट्र बैंकले नेपाल इन्भेष्टमेन्ट मेगा बैंकका सञ्चालक तथा प्रमुख कार्यकारी अधिकृतविरुद्ध काठमाडौं जिल्ला अदालतमा अभियोगपत्र दायर भए पनि बैंकको दैनिक कार्यसञ्चालनमा कुनै जटिलता नरहेको जनाएको छ।

बैंकका सञ्चालक तथा प्रमुख कार्यकारी अधिकृतविरुद्ध अभियोगपत्र दायर भएको विषयमा धारणा सार्वजनिक गर्दै राष्ट्र बैंकले बैंकको सञ्चालन अवस्थाबारे निरन्तर अनुगमन भइरहेको जनाएको हो।

राष्ट्र बैंकका अनुसार विद्यमान कानुनी व्यवस्थाका विषयमा आवश्यक राय–सुझाव लिने तथा सम्बन्धित पक्षसँग छलफल गर्ने काम भइरहेको छ। साथै, बैंकको तरलता अवस्था तथा वित्तीय सबलतासम्बन्धी परिसूचकहरू तोकिएको मापदण्डअनुसार सन्तोषजनक रहेको राष्ट्र बैंकले स्पष्ट पारेको छ।

बैंकको दैनिक कार्य सञ्चालनमा कुनै पनि प्रकारको जटिलता उत्पन्न हुने अवस्था हालसम्म नदेखिएको राष्ट्र बैंकको भनाइ छ।

राष्ट्र बैंकले कानुनबमोजिम सञ्चालक समिति, उच्च व्यवस्थापन तथा बैंक सञ्चालनका सम्बन्धमा आवश्यक उपाय अवलम्बन गरिने जनाएको छ।

Originally published on abcnews.com.np.