काठमाडौं। जनआस्थाका प्रधानसम्पादक किशोर श्रेष्ठलाई थुनामा राख्ने अनुमतिका लागि काठमाडौं जिल्ला अदालतमा उपस्थित गराइएको छ ।

वैयक्तिक गोपनीयताको हनन् सम्बन्धी कसुरको आरोपमा पक्राउ परेका जनआस्थाका प्रधानसम्पादक किशोर श्रेष्ठलाई थुना अनुमतिका लागि काठमाडौं जिल्ला अदालतमा उपस्थित गराइएको छ ।

उनलाई थुनुवा पोसाकमा अदालतमा उपस्थित गराइएको हो । श्रेष्ठलाई थुनामा अनुमतिका लागि इजलासमा बहस सुरु भएको छ ।

अदालतमा उपस्थित गराउनुअघि श्रेष्ठलाई हत्कडी लगाएर सरकारी वकिलको कार्यालयमा उपस्थित गराइएको थियो । अदालतमा रहेका नेपाल पत्रकार महासंघका कोषाध्यक्ष रामकृष्ण अधिकारीले थुना अनुमतिका लागि इजलासमा वहस चलिरहेको जानकारी दिए । ‘‘अहिले इजलासमा वहस चलिरहेको छ । केही समयमै एउटा आदेश आउने तयारी छ,’’ कोषाध्यक्ष अधिकारीले भने ।

प्रत्यक्षदर्शी अधिकारीका अनुसार सरकारी वकील कार्यालय लैजाँदा हत्कडी लगाएर लगिएको थियो । तर अदालत लैजाने बेला भने श्रेष्ठलाई थुनुवा पोसाकमा पेश गरिएको थियो ।

सरकारी वकिल र श्रेष्ठका कानुनव्यवसायीको वहस सकिएपछि थुना अनुमति दिने वा नदिने बिषयमा आदेश आउने छ । अहिले पत्रकार महासंघका पदाधिकारी, पत्रकार एवंम विभिन्न संघसंस्थाका व्यक्तिहरू अदालत पुगेका छन् ।

Originally published on abcnews.com.np.