काठमाडौं । प्रहरीले पत्रकार किशोर श्रेष्ठको काठमाडौंस्थित घरमा पुनः खानतलासी गरेको छ। प्रहरी टोलीले केहीबेरअघि श्रेष्ठको निवासमा पुगेर खानतलासी गर्नुका साथै सीसी क्यामरासँग सम्बन्धित स्टोरेज डिभाइसहरू बरामद गरेको उनकी पत्नी सरस्वती श्रेष्ठले बताएकी छन्।

सरस्वतीका अनुसार प्रहरी टोलीले घरमा रहेको सीसी क्यामराको डिभाइस तथा स्टोरेज सामग्री नियन्त्रणमा लिएर गएको हो। खानतलासीको कारण र बरामद सामग्रीबारे प्रहरीले तत्काल विस्तृत जानकारी दिएको छैन।

जनआस्था साप्ताहिकका सम्पादक श्रेष्ठलाई प्रहरीले बुधबार साँझ ललितपुरस्थित निवासबाट पक्राउ गरेको थियो। पक्राउपछि प्रहरीले श्रेष्ठको निवास तथा धोबीघाटस्थित जनआस्था कार्यालयमा समेत खानतलासी गरेको थियो।

त्यसक्रममा प्रहरीले कम्प्युटर, सीपीयू तथा अन्य विद्युतीय उपकरण नियन्त्रणमा लिएको थियो। अहिले पुनः घरमा खानतलासी गरेर सीसी क्यामराका स्टोरेज डिभाइस बरामद गरिएपछि प्रहरी अनुसन्धानको दायरा थप विस्तार भएको देखिएको छ।

श्रेष्ठलाई प्रहरीले वैयक्तिक गोपनीयता हननसम्बन्धी कसुरमा पक्राउ गरेको जनाएको छ। यद्यपि, उनीमाथि लागेको आरोप र अनुसन्धानको विस्तृत विवरण प्रहरीले सार्वजनिक गरेको छैन।

यसैबीच श्रेष्ठलाई गैरकानुनी रूपमा थुनामा राखिएको दाबी गर्दै उनकी पत्नी सरस्वती श्रेष्ठले सर्वोच्च अदालतमा बन्दीप्रत्यक्षीकरणको रिट दायर गरेकी छन्। रिटमाथि शुक्रबार सुनुवाइ हुँदैछ।

यसअघि काठमाडौं जिल्ला अदालतले बिहीबार प्रहरीको मागअनुसार श्रेष्ठलाई थप अनुसन्धानका लागि तीन दिन हिरासतमा राख्न अनुमति दिएको थियो।

श्रेष्ठको पक्राउ र त्यसपछि भएको खानतलासीको विरोधमा पत्रकार तथा सञ्चारसम्बद्ध संघ–संस्थाले भने प्रेस तथा अभिव्यक्ति स्वतन्त्रताको विषय उठाउँदै आएका छन्। नेपाल पत्रकार महासंघले समेत काठमाडौं प्रहरी परिसर अगाडि धर्ना दिँदै श्रेष्ठको तत्काल रिहाइको माग गरेको थियो।

अब सर्वोच्च अदालतमा हुने बन्दीप्रत्यक्षीकरणसम्बन्धी सुनुवाइसँगै श्रेष्ठको हिरासत र प्रहरी अनुसन्धानको कानुनी आधारबारे थप स्पष्टता आउने अपेक्षा गरिएको छ।

Originally published on abcnews.com.np.