काठमाडौं । नेपाली कांग्रेसको संस्थापनइतर समूहका नेता डा. शशांक कोइरालाले पार्टीको सभापति शेरबहादुर देउवा नै रहेको र कांग्रेस उहाँकै नेतृत्वमा अघि बढ्ने बताएका छन्।

संस्थापनइतर समूहले आयोजना गरेको राष्ट्रिय कार्यकर्ता भेलालाई सम्बोधन गर्दै कोइरालाले देउवाको उपस्थितिले भेला थप प्रभावकारी बनेको दाबी गरे।

“शेरबहादुर देउवाको भाग्य नै राम्रो छ,” कोइरालाले भने, “भेलामा उहाँको सहभागिताले कार्यक्रम सफल भएको छ।”

देउवाको स्वागतका क्रममा देखिएको उत्साहप्रति आफू आश्चर्यमा परेको पनि कोइरालाले बताए। उनका अनुसार देउवाको आगमनले कार्यकर्तामा देखिएको उत्साहले पार्टीभित्र उनको प्रभाव अझै कायम रहेको संकेत गरेको छ।

“शेरबहादुर देउवा आउनासाथ मलाई थाहा थियो, यो भेला सफल हुन्छ,” उनले भने, “हिजो उहाँको स्वागतमा जुन उत्साह देखेँ, मलाई अचम्म लाग्यो।”

कोइरालाले कांग्रेसको वर्तमान नेतृत्वबारे स्पष्ट धारणा राख्दै भने, “हाम्रो सभापति शेरबहादुर देउवा नै हो र उहाँकै नेतृत्वमा कांग्रेस अघि बढ्छ।”

उनको यो अभिव्यक्ति कांग्रेसभित्र नेतृत्व परिवर्तन, पुस्तान्तरण र आगामी महाधिवेशनको तयारीबारे बहस चलिरहेका बेला आएको हो।

यसअघि संस्थापनइतर समूहकै नेताहरूले पार्टीमा नयाँ पुस्तालाई नेतृत्वमा ल्याउनुपर्ने तथा विधि र प्रक्रियाबाट नेतृत्व परिवर्तन गर्नुपर्ने धारणा सार्वजनिक गर्दै आएका थिए। यस्तो अवस्थामा कोइरालाले देउवालाई नै सभापति मानेर उहाँकै नेतृत्वमा कांग्रेस अघि बढ्ने धारणा राख्नुले संस्थापनइतर समूहभित्रै नेतृत्वबारे फरक–फरक धारणा रहेको संकेत गरेको छ।

राष्ट्रिय कार्यकर्ता भेलामा देउवाको सहभागिता र उनको स्वागतमा देखिएको कार्यकर्ताको उत्साहलाई कोइरालाले पार्टीभित्रको एकता र नेतृत्वप्रतिको भावनासँग जोडेर प्रस्तुत गरेका छन्।

उनको पछिल्लो अभिव्यक्तिले कांग्रेसको आगामी राजनीतिक दिशा र नेतृत्वबारे चलिरहेको बहसमा थप नयाँ तरंग ल्याएको छ।

Originally published on abcnews.com.np.