काठमाडौं । नेपाली कांग्रेसकी नेत्री सुजाता कोइरालाले पार्टीभित्रको इतर पक्षका नेताहरूलाई अहंकार त्यागेर एकताको पक्षमा उभिन आग्रह गरेकी छन्। उनले पार्टीलाई बलियो बनाउन पद र गुटको स्वार्थभन्दा माथि उठ्नुपर्ने बताएकी छन्।

शुक्रबार कांग्रेस केन्द्रीय कार्यसमितिको बैठकमा बोल्दै कोइरालाले निवर्तमान सभापति शेरबहादुर देउवालाई समेत पदको प्रतिस्पर्धाबाट माथि उठेर पार्टीको अभिभावकीय भूमिका निर्वाह गर्न आग्रह गरिन्।

उनले मुलुक र पार्टीप्रतिको जिम्मेवारीबोध गर्दै सबै नेता–कार्यकर्ता पद, गुट र व्यक्तिगत स्वार्थभन्दा माथि उठेर एकताबद्ध हुनुपर्नेमा जोड दिइन्।

कोइरालाले आफ्ना पिता तथा कांग्रेसका पूर्वसभापति गिरिजाप्रसाद कोइरालाले पार्टीको लोकप्रियता बढ्दा त्यसविरुद्ध षड्यन्त्रहरू सुरु हुने बताउने गरेको स्मरण गरिन्।

“गिरिजाबाबुले सधैँ भन्नुहुन्थ्यो– कांग्रेस जबजब बलियो र लोकप्रिय हुन्छ, तबतब यसका विरुद्ध अनेक षड्यन्त्रहरू सुरु हुन्छन्। आज ठीक त्यस्तै अवस्था देखिएको छ,” उनले भनिन्।

गगन थापाको नेतृत्वप्रति विश्वास

कोइरालाले कांग्रेसका सभापति गगन थापाको नेतृत्वप्रति आफ्नो विश्वाससमेत व्यक्त गरिन्।

थापाले पार्टीको नेतृत्व सम्हाल्दा सुरुमा आफूलाई उनको नेतृत्व क्षमताबारे केही चिन्ता लागेको भए पनि अहिले उनले आफ्नो कार्यक्षमता र व्यवहारबाट सफल नेतृत्व प्रमाणित गरिसकेको कोइरालाको भनाइ छ।

“सुरुवाती दिनमा गगन थापाले पार्टी कसरी हाँक्लान् भन्ने मलाई केही चिन्ता लागेको थियो। तर अहिले उहाँले आफ्नो कार्यक्षमता र व्यवहारबाटै सफल नेतृत्व प्रमाणित गरिसक्नुभएको छ,” उनले भनिन्।

उनले आगामी पाँच वर्षपछि हुने आमनिर्वाचनमा कांग्रेसले स्पष्ट बहुमत प्राप्त गर्ने दाबीसमेत गरिन्।

“अबको पाँच वर्षपछि हुने आम निर्वाचनमा कांग्रेसले स्पष्ट बहुमत ल्याउनेछ। साथै सातै प्रदेश र स्थानीय तहहरूमा समेत कांग्रेसकै वर्चस्व र बहुमत कायम हुनेमा म पूर्ण विश्वस्त छु,” कोइरालाले भनिन्।

इतर समूहलाई विग्रहको बाटो छाड्न आग्रह

कोइरालाले कांग्रेसभित्रको इतर समूहका नेताहरूलाई बदलिँदो राजनीतिक परिस्थिति बुझेर अघि बढ्न आग्रह गरिन्।

उनले ‘समयको पदचाप बुझ्न’ आवश्यक रहेको भन्दै आन्तरिक विवाद र विग्रहले पार्टीलाई कमजोर बनाउने चेतावनी दिइन्।

पद तथा नेतृत्वको विवादमा अल्झिनुभन्दा पार्टी सुदृढीकरणमा केन्द्रित हुनुपर्ने उनको भनाइ थियो।

कोइरालाले कांग्रेसको आन्तरिक एकता नै आगामी राजनीतिक सफलताको आधार भएको उल्लेख गर्दै सबै पक्षलाई आपसी मतभेद त्यागेर पार्टीलाई बलियो बनाउने अभियानमा जुट्न आह्वान गरिन्।

उनको अभिव्यक्ति कांग्रेसभित्र नेतृत्व, गुटगत समीकरण र आगामी निर्वाचनको तयारीबारे बहस तीव्र भइरहेका बेला आएको हो। कोइरालाले एकातिर देउवालाई अभिभावकीय भूमिकामा रहन आग्रह गरेकी छन् भने अर्कोतर्फ वर्तमान नेतृत्वप्रति विश्वास व्यक्त गर्दै पार्टीभित्रको विवादलाई तत्काल अन्त्य गर्नुपर्ने सन्देश दिएकी छन्।

Originally published on abcnews.com.np.