काठमाडौं । नेपाली कम्युनिस्ट पार्टी (नेकपा)ले रोल्पामा पहिरोमा परी घाइते भएकाहरूको निःशुल्क तथा प्रभावकारी उपचारको व्यवस्था गर्न सरकारसँग माग गरेको छ।

नेकपाका प्रवक्ता प्रकाश ज्वालाले शुक्रबार विज्ञप्ति जारी गर्दै पहिरोमा परी ज्यान गुमाएकाका परिवारलाई तत्काल राहत तथा उचित क्षतिपूर्ति उपलब्ध गराउन सरकारसँग आग्रह गरेका हुन्।

लगातारको वर्षाका कारण रोल्पाका विभिन्न क्षेत्रमा पहिरोको जोखिम बढिरहेको भन्दै नेकपाले जोखिमयुक्त बस्तीमा थप क्षति हुन नदिन तत्काल उद्धार तथा सुरक्षाका उपाय अपनाउन सरकारको ध्यानाकर्षण गराएको छ।

पार्टीले जोखिममा रहेका स्थानीयको तत्काल जीवनरक्षा, पहिरोपीडितको खोज तथा उद्धार र विस्थापितको पुनर्स्थापनालाई प्राथमिकतामा राख्नुपर्ने जनाएको छ।

नेकपाले दीर्घकालीन रूपमा पहिरोको उच्च जोखिममा रहेका बस्तीका बासिन्दालाई सुरक्षित स्थानमा स्थानान्तरण गरी पुनर्वासको व्यवस्था गर्नसमेत माग गरेको छ।

विज्ञप्तिमा भनिएको छ, “मृतकका परिवारलाई आवश्यक राहत र क्षतिपूर्ति उपलब्ध गराउन र त्यस्ता जोखिमयुक्त बस्तीमा हुनसक्ने सम्भावित थप क्षतिप्रति सचेत रहँदै तत्काल स्थानीय जनताको जीवनरक्षा, पीडितहरूको उद्धार, विस्थापितहरूको पुनर्स्थापना र दीर्घकालीन रूपमा स्थानीय बासिन्दाहरूलाई सुरक्षित स्थानमा पुनर्वासको व्यवस्था गर्न हाम्रो पार्टी सरकारसँग जोडदार माग गर्दछ।”

नेकपाले पहिरोमा बेपत्ता भएकाहरूको खोजी तथा उद्धारलाई तीव्र बनाउन, घाइतेको उपचार र विस्थापित परिवारको पुनर्स्थापनामा सक्रिय रूपमा जुट्न सरकार, सुरक्षा निकाय, स्थानीय तह तथा सम्बन्धित सबै पक्षलाई अपिल गरेको छ।

लगातारको वर्षाका कारण रोल्पाका विभिन्न क्षेत्रमा पहिरो तथा बाढीको जोखिम बढिरहेका बेला नेकपाले सरकारको विपद् व्यवस्थापन संयन्त्रलाई थप प्रभावकारी बनाउनुपर्ने आवश्यकता औँल्याएको हो।

Originally published on abcnews.com.np.