काठमाडौं । कपिलवस्तु नगरपालिकाका पूर्वमेयर किरण सिंह तीन दिनदेखि सम्पर्कविहीन भएका छन्। उनी शुक्रबार कपिलवस्तुको गोरुसिंगे जंगलबाट सम्पर्कविहीन भएको खुलेको हो।

सिंहले प्रयोग गर्ने लु.प्र. ०१–०१३ प ७९७० नम्बरको मोटरसाइकल गोरुसिंगे जंगलभित्र फेला परेको छ। तर मोटरसाइकल भेटिएको स्थान आसपास खोजी गर्दा पनि सिंहको अवस्था अहिलेसम्म पत्ता लाग्न सकेको छैन।

जिल्ला प्रहरी कार्यालय कपिलवस्तुले उनको खोजीका लागि ठूलो संख्यामा प्रहरी परिचालन गरेको छ। खोजीमा तालिमप्राप्त कुकुर र ड्रोनसमेत प्रयोग गरिएको प्रहरीले जनाएको छ।

जिल्ला प्रहरी कार्यालय कपिलवस्तुका प्रमुख एसपी मनोहरप्रसाद भट्टले हालसम्म सिंहबारे कुनै नयाँ तथ्य फेला नपरे पनि खोजी कार्यलाई तीव्र बनाइएको जानकारी दिए।

शुक्रबारदेखि नै खोजी

एसपी भट्टका अनुसार सिंहले आफू समस्यामा परेको जानकारी आफन्तलाई समेत गराएको देखिएको छ।

उनका अनुसार शुक्रबार नै आफन्तले सिंहको खोजी सुरु गरेका थिए। तर उनी नभेटिएपछि साँझ करिब ६ बजेतिर प्रहरीलाई सिंह हराएको जानकारीदिइएको थियो।

त्यसपछि प्रहरीले राति करिब २ बजेसम्म खोजी गरे पनि सिंह फेला नपरेको एसपी भट्टले बताएका छन्।

‘मेयर सिंहले आफू समस्या परेको जानकारी आफ्ना आफन्तलाई पनि गरेको देखिन्छ। शुक्रबार नै आफन्तले समेत उहाँको खोजी गर्नुभएको थियो। तर नभेटिएपछि करिब ६ बजेतिर हामीलाई पनि हराएको जानकारी आएको थियो,’ एसपी भट्टले भिडियो सन्देशमार्फत भनेका छन्, ‘हामीले पनि राति २ बजेसम्म खोज्दा भेट्टाउन सकेनौँ।’

रिसोर्ट जाने भन्दै निस्किएका थिए

प्रहरीका अनुसार सिंह शुक्रबार दिउँसो करिब २ बजे गोरुसिंगे जंगलभित्र निर्माणाधीन आफ्नै रिसोर्टमा जाने भन्दै घरबाट निस्किएका थिए।

तर त्यसपछि उनी सम्पर्कमा आएनन्।

उनले प्रयोग गर्ने मोटरसाइकल भने जंगलभित्र फेला परेपछि प्रहरीले खोजीलाई थप केन्द्रित गरेको हो।

आइतबार बिहानदेखि एसपी भट्टसहितको प्रहरी टोली गोरुसिंगे जंगलमै खटिएर सिंहको खोजी गरिरहेको छ। जंगलको भौगोलिक अवस्थाका कारण खोजी चुनौतीपूर्ण बनेको प्रहरीले जनाएको छ। प्रहरीले मोटरसाइकल भेटिएको स्थानलाई केन्द्र बनाएर आसपासको क्षेत्रमा खोजी गरिरहेको छ।

खोजीका क्रममा ड्रोनबाट जंगल क्षेत्रको निगरानी गर्नुका साथै तालिमप्राप्त कुकुरसमेत परिचालन गरिएको छ। ठूलो संख्यामा प्रहरी परिचालन गरेर जंगलका विभिन्न क्षेत्रमा खोजी भइरहेको छ।

हालसम्म सिंहको अवस्था वा उनी सम्पर्कविहीन हुनुको कारणबारे कुनै निष्कर्षमा पुग्न नसकिएको प्रहरीले जनाएको छ।

पूर्वमेयर सिंह कहाँ छन् र जंगलमा उनको मोटरसाइकल मात्रै किन भेटियो भन्ने प्रश्नको जवाफ खोज्न प्रहरीले खोजी अभियानलाई थप तीव्र बनाएको छ।

Originally published on abcnews.com.np.