चितवन । झण्डै सात वर्षसम्म धुलो, हिलो, जाम र सास्तीको पर्याय बनेको नारायणगढ–बुटवल सडकखण्ड अहिले यात्रुका लागि सहज बनेको छ। सडकको अधिकांश निर्माण सम्पन्न भएसँगै नारायणगढदेखि बुटवलसम्मको ११३ किलोमिटर दूरी अहिले डेढदेखि दुई घण्टामै पार गर्न सकिने अवस्था बनेको हो। एक समय यही सडक पार गर्न १० देखि १२ घण्टासम्म लाग्ने र कतिपय यात्रुले रात नै सडकमा बिताउनुपर्ने अवस्था थियो। अहिले भने निजी तथा सार्वजनिक सवारीसाधन सहज रूपमा सञ्चालन भइरहेका छन्।

यात्रु र व्यवसायीहरूले सडक विस्तारपछि विगतको सास्ती अन्त्य भएको अनुभव सुनाएका छन्। कतिपयले एक घण्टा ३० मिनेटमै बुटवल–नारायणगढ यात्रा पूरा गरेको बताएका छन् भने सार्वजनिक यातायातसमेत यात्रु चढाउँदै–ओराल्दै तीन घण्टाभित्र गन्तव्य पुग्न थालेका छन्। दाउन्ने क्षेत्रमा हुने लामो जाम, दैनिक सवारी बिग्रिने समस्या र वैकल्पिक मार्ग प्रयोग गर्नुपर्ने बाध्यता अहिले हटेको व्यवसायीहरूको भनाइ छ।

नारायणगढ–बुटवल सडक आयोजनाका अनुसार सडक निर्माणको करिब ९२ प्रतिशत काम सम्पन्न भइसकेको छ। अहिले सडक सुरक्षासम्बन्धी संरचना र केही स्थानमा नाली निर्माणको काम मात्र बाँकी छ। करिब १७ अर्ब रुपैयाँ लागतको यो आयोजना एसियाली विकास बैंकको सहुलियतपूर्ण ऋण र नेपाल सरकारको लगानीमा निर्माण भइरहेको हो। दुई लेनको सडकलाई चार लेन तथा बजार क्षेत्रका २८ किलोमिटर सडकलाई छ लेनमा विस्तार गरिएको छ। पटक–पटक म्याद थपिँदै आएको यो आयोजना अन्तिम चरणमा पुगेसँगै पूर्व–पश्चिम यात्रा अब धेरै सहज र छिटो भएको यात्रुहरूले बताएका छन्।

Originally published on abcnews.com.np.