रुपन्देही । नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टी (माओवादी) मा रोल्पाबाटै नेताहरूको पार्टी परित्याग गर्ने क्रम देखिएको छ। पार्टीको विभिन्न जिम्मेवारीमा रहेका केन्द्रीय सदस्यसहित १३ जना नेताले एकैसाथ पार्टी छाडेको घोषणा गरेका छन्।

रोल्पाको गङ्गादेव गाउँपालिका निवासी तथा पार्टीका केन्द्रीय सदस्य लालबहादुर वली ‘विश्व’ सहित १३ जनाले आइतबार प्रेस विज्ञप्ति जारी गर्दै पार्टी परित्याग गरेको घोषणा गरेका हुन्। रोल्पालाई विप्लव नेतृत्वको पार्टीले आफ्नो बलियो राजनीतिक आधार क्षेत्रका रूपमा दाबी गर्दै आएको थियो।

पार्टी परित्याग गर्नेमा जिल्ला सचिवालय सदस्य नन्दे वली ‘मङ्गल’, जिल्ला सदस्य पूर्णबहादुर वली, गाउँपालिका सदस्य धनबहादुर केसी, तिलक महरा, मनवीर घर्ती, लोकेन्द्र डाँगी, युवा सङ्गठन नेपालका गाउँपालिका सदस्य रुद्र केसी, हिरालाल वली, कमल वली, निर्मण वली र लेखनाथ डिसीलगायत रहेका छन्।

उनीहरूले पार्टीको पछिल्लो राजनीतिक कार्यदिशा, संगठनात्मक गतिविधि तथा नेतृत्वको कार्यशैलीप्रति असन्तुष्टि जनाउँदै पार्टी परित्याग गरेको बताएका छन्।

पार्टी छाडेका वलीसहितका नेताहरूले सिलु नेतृत्वको नेकपामा समाहित हुने घोषणा गरेका छन्।

यसअघि पनि रुपन्देहीका वसन्त श्रेष्ठ, शरद वलीलगायतका नेताहरूले विप्लव नेतृत्वको नेकपा (माओवादी) परित्याग गरेका थिए। पार्टीभित्रको राजनीतिक तथा संगठनात्मक विवादका कारण असन्तुष्ट नेताहरूले छुट्टै धार निर्माण गर्दै आएको पृष्ठभूमिमा रोल्पाबाट भएको यो पछिल्लो बहिर्गमनलाई अर्थपूर्ण रूपमा हेरिएको छ।

विप्लव नेतृत्वको पार्टीले पछिल्लो समय संगठनात्मक अनुशासन र राजनीतिक कार्यदिशाको विषयमा असहमति जनाउने नेता–कार्यकर्तामाथि कारबाही गर्दै आएको आरोप लाग्दै आएको छ। यही असन्तुष्टि र आन्तरिक टकरावका बीच एकपछि अर्को नेता पार्टीबाट बाहिरिन थालेपछि संगठनभित्रको चुनौती थपिएको देखिन्छ।

Originally published on abcnews.com.np.