काठमाडौं । नेपाली कांग्रेस संस्थापनइतर पक्षका नेता गुरु बरालले विशेष महाधिवेशनले पार्टीलाई सुदृढ बनाउनुको साटो लोकतन्त्र र राष्ट्रियतालाई समेत कमजोर बनाएको आरोप लगाएका छन्।

शुक्रबार संस्थापनइतर पक्षले आयोजना गरेको राष्ट्रिय भेलालाई सम्बोधन गर्दै बरालले विशेष महाधिवेशनको प्रक्रिया र त्यसबाट उत्पन्न राजनीतिक अवस्थाप्रति असन्तुष्टि जनाएका हुन्।

उनले विशेष महाधिवेशनले कांग्रेसभित्रको आन्तरिक समस्या समाधान गर्नुको साटो पार्टीलाई थप विभाजित बनाएको र त्यसको असर लोकतान्त्रिक मूल्य तथा राष्ट्रिय हितमा समेत परेको दाबी गरे।

“विशेष महाधिवेशनले पार्टीलाई होइन, लोकतन्त्र र राष्ट्रियतालाई नै धरासायी बनायो,” बरालले भने।

सर्वोच्चमा पुनरावलोकनको आधार

बरालले लोकतन्त्रमा खतरा बढेको महसुस भएकै कारण विशेष महाधिवेशनको विषयलाई लिएर सर्वोच्च अदालतमा पुनरावलोकनको निवेदन दायर गरिएको बताए।

उनका अनुसार विशेष महाधिवेशनको प्रक्रियाबाट उत्पन्न विवादलाई केवल पार्टीभित्रको नेतृत्व संघर्षका रूपमा मात्र हेर्न नहुने भन्दै पार्टी, लोकतन्त्र र राष्ट्रियताको हितमा गम्भीरतापूर्वक समीक्षा आवश्यक रहेको छ।

उनले विशेष महाधिवेशनको पक्षमा रहेका नेताहरूलाई समेत विभाजनको बाटो त्यागेर एकै ठाउँमा आउन आग्रह गरे।

‘आत्मालोचना गर्दै संवादमा आउनुस्’

बरालले विशेष महाधिवेशन पक्षधर नेताहरूलाई संयमित भएर आत्मालोचना गर्न सुझाव दिए। पार्टीभित्रको विवादलाई थप चर्काएर कांग्रेसलाई कमजोर बनाउनेभन्दा संवाद र सहमतिबाट समाधान खोज्नुपर्ने उनको भनाइ थियो।

उनले कांग्रेसको आन्तरिक विवादको असर पार्टीको संगठन र आगामी राजनीतिक भूमिकामा मात्र नभई देशको लोकतान्त्रिक प्रणालीमै पर्न सक्ने चेतावनी दिए।

बरालले पार्टीको एकता कायम गर्न सबै पक्षले आ–आफ्ना अडानमा पुनर्विचार गर्दै संवाद, सहमति र लोकतान्त्रिक विधिलाई केन्द्रमा राख्नुपर्नेबताए। विशेष महाधिवेशनपछि कांग्रेसभित्र देखिएको वैधानिकता र नेतृत्वसम्बन्धी विवाद समाधानका लागि राजनीतिक तथा कानुनी दुवै तहबाट पहल आवश्यक रहेको उनको संकेत थियो।

Originally published on abcnews.com.np.