काठमाडौं । सगरमाथाको रहस्य, चुनौती र जलवायु परिवर्तनको प्रभावलाई समेटिएको वृत्तचित्र **‘रोड टु एभरेस्ट’**को ट्रेलर सार्वजनिक गरिएको छ ।

वृत्तचित्रले समुद्री सतहदेखि विश्वको सर्वोच्च शिखरसम्मको असाधारण यात्रालाई साहस, संघर्ष र दृढ संकल्पका साथ प्रस्तुत गरेको निर्माण पक्षले जनाएको छ ।

नेपाली प्राविधिकको संलग्नतामा तयार गरिएको वृत्तचित्रमा कुनै पनि कृत्रिम वा कम्प्युटर सिर्जित दृश्य प्रयोग नगरिएको दाबी गरिएको छ । वृत्तचित्र निर्माणका लागि दुई वर्ष लागेको बताइएको छ ।

यसको कथा सन्तोष आचार्य र निर्मल श्रेष्ठले लेखेका हुन् भने सञ्चारकर्मी भूषण दाहालले स्वरांकन गरेका छन् । वृत्तचित्र नेपाली र अंग्रेजी दुवै भाषामा तयार गरिएको छ ।

५० वर्षपछि सगरमाथाको सपना

वृत्तचित्रमा ५० वर्ष नाघेका राज गुरुङको प्रेरणादायी यात्रालाई मुख्य विषय बनाइएको छ । उमेर र समयको सीमालाई चुनौती दिँदै सगरमाथा आरोहण गर्ने उनको सपनालाई वृत्तचित्रले पछ्याएको छ ।

त्यसैगरी, सगरमाथा आरोहणका जोखिम, शेर्पा समुदायको योगदान, आरोहीको साहस तथा जलवायु परिवर्तनका कारण तीव्र रूपमा बदलिँदै गएको हिमाली वातावरणलाई समेत वृत्तचित्रमा समेटिएको छ ।

‘रोड टु एभरेस्ट’को निर्देशन निर्मल श्रेष्ठले गरेका छन् ।

Originally published on abcnews.com.np.