काठमाडौं । नेपाली कांग्रेसका नेता तथा पूर्वउपसभापति विमलेन्द्र निधिले पार्टीको १५औँ महाधिवेशन शेरबहादुर देउवाकै नेतृत्वमा हुने दाबी गरेका छन्।

शुक्रबार काठमाडौंमा आयोजित संस्थापनइतर पक्षको राष्ट्रिय भेलालाई सम्बोधन गर्दै निधिले भेलाबाट फर्किंदा कार्यकर्ताले यही सन्देश लिएर जानुपर्ने बताए।

उनले १४औँ महाधिवेशनबाट निर्वाचित सभापति र कार्यसमितिलाई मात्रै १५औँ महाधिवेशन आयोजना गर्ने अधिकार रहेको दाबी गरे।

“१४औँबाट जो सभापति बनेको छ, जो कार्यसमिति बनेको छ, त्यसलाई मात्र १५औँ महाधिवेशन गर्ने अधिकार छ। फर्केर जाँदा त्यही सन्देश लिएर जानुहोस्,” निधिले भने।

विशेष महाधिवेशनप्रति आपत्ति

निधिले विशेष महाधिवेशनलाई अराजक, अवैध र धोकाधडीपूर्ण भएको आरोप लगाए। विशेष महाधिवेशनबाट बनेको कार्यसमिति तथा पदाधिकारीलाई १५औँ महाधिवेशन आयोजना गर्ने अधिकार नभएको उनको दाबी छ।

उनले १४औँबाट १५औँ महाधिवेशनमा जानु पार्टीको स्वाभाविक राजनीतिक निरन्तरता भएको बताए।

“नेपाली कांग्रेसलाई स्वाभाविक रूपले १५औँसम्म निरन्तरता दिने काम १४औँबाट निर्वाचित कार्यसमितिले गर्नुपर्छ,” उनले भने।

१५औँ महाधिवेशनको तयारी मुख्य उद्देश्य

निधिका अनुसार राष्ट्रिय भेला आयोजना गर्नुको प्रमुख उद्देश्य नै १५औँ महाधिवेशनको तयारी गर्नु हो।

डा. शशांक कोइरालाको नेतृत्वमा गठित मूल आयोजक समितिले भेलाबाट आवश्यक निर्णय र तयारी अघि बढाएर १५औँ महाधिवेशन सफलतापूर्वक सम्पन्न गर्ने पहिलो प्राथमिकता राखेको उनले बताए।

Originally published on abcnews.com.np.