रौतहट । भारतको तीर्थयात्रामा गएको बस दुर्घटनामा पर्दा रौतहटका तीन जना तीर्थयात्रीको मृत्यु भएको छ। बस र मालवाहक ट्रक एकआपसमा ठोक्किँदा भारतको झारखण्डस्थित कोडरमा जिल्लाको सतगावाँ थाना क्षेत्रमा शुक्रबार बिहान दुर्घटना भएको हो।

दुर्घटनामा गरुडा नगरपालिका–६, पोठियाहीका ६५ वर्षीय नवलकिशोर चौधरी, उनकी ६२ वर्षीया श्रीमती सुन्दरकला देवी र १२ वर्षीय शिवम महतोको मृत्यु भएको वडाध्यक्ष रामबाबु चौधरीले जानकारी दिए।

गत आइतबार ना.६ख १५५४ नम्बरको बसमा चालकदलसहित ४६ जना तीर्थयात्री बोलबम यात्राका लागि भारतको झारखण्डस्थित वैद्यनाथ धामतर्फ गएका थिए। तीर्थयात्रीहरू बासुकीनाथको दर्शनपछि देवघर हुँदै राजगिर जाने क्रममा दुर्घटनामा परेका हुन्।

दुर्घटनामा कम्तीमा आठ जना तीर्थयात्री गम्भीर घाइते भएको स्थानीय स्रोतले जनाएको छ। बसमा कटहरिया नगरपालिका–डुमरिया क्षेत्रका २० जना यात्रुसमेत रहेको बताइएको छ। उनीहरूमा १२ पुरुष, पाँच महिला र तीन बालबालिका रहेको स्थानीय रामबाबु यादवले जानकारी दिए।

दुर्घटनाको विस्तृत कारण र घाइतेहरूको अवस्थाबारे थप विवरण प्राप्त हुन बाँकी रहेको जिल्ला प्रहरी कार्यालय रौतहटले जनाएको छ। प्रहरीका प्रवक्ता प्रहरी नायब उपरीक्षक वसन्त गौतमले घाइतेहरूको विस्तृत विवरण अझै प्राप्त नभएको बताए।

दुर्घटनाको खबर फैलिएपछि मृतक तथा घाइतेका आफन्तमा शोक र चिन्ता छाएको छ। पोठियाही र डुमरिया गाउँमा घटनाले शोकको वातावरण बनेको छ।

मृतक तथा घाइतेका आफन्त शुक्रबार बिहानै चार वटा सवारीसाधन रिजर्भ गरेर भारततर्फ प्रस्थान गरेका छन्। घटनाबारे भारतीय स्थानीय प्रशासन र प्रहरीले आवश्यक अनुसन्धान तथा उद्धार प्रक्रिया अघि बढाइरहेको जनाइएको छ।

Originally published on abcnews.com.np.