काठमाडौं । नेपाली कांग्रेसका निवर्तमान कार्यवाहक सभापति पूर्णबहादुर खड्काले धम्की र त्रासका कारण निर्वाचन आयोगले कांग्रेसको आधिकारिकतासम्बन्धी विवादमा आफूहरूलाई पराजित गरेको आरोप लगाएका छन्।

शुक्रबार काठमाडौँको सुकेधारास्थित मिराकल पार्टी प्यालेसमा आयोजित संस्थापनइतर पक्षको राष्ट्रिय भेलालाई सम्बोधन गर्दै खड्काले विशेष महाधिवेशनबाट गगन थापा नेतृत्वमा गठन भएको केन्द्रीय कार्यसमितिलाई निर्वाचन आयोगले दिएको मान्यतामाथि प्रश्न उठाए।

निर्वाचन आयोगले पुराना नजिर, प्रक्रिया र कानुनी अभ्यासलाई बेवास्ता गर्दै आफूहरूभन्दा थापा नेतृत्वको समितिलाई आधिकारिकता दिएको उनको दाबी थियो।

“धम्क्याएको भरमा, तर्साएको भरमा निर्वाचन आयोगले हामीलाई हरायो,” खड्काले भने।

उनले निर्वाचन आयोगले आफूहरूले नेतृत्व गरेको समितिलाई अवैधानिक ठहर गर्दै विशेष महाधिवेशनबाट आएको समितिलाई मान्यता दिनु गलत भएको जिकिर गरे। अब सर्वोच्च अदालतबाट आफूहरूले न्याय पाउने उनको विश्वास छ।

यसअघि सर्वोच्च अदालतबाट भएको फैसला त्रुटिपूर्ण रहेको र अदालतले पुनरावलोकनका लागि अनुमति दिइसकेकाले अब कानुनी रूपमा आफूहरूको पक्ष बलियो हुने खड्काले बताए।

‘एकताका लागि पटक–पटक सहमति भयो, कार्यान्वयन भएन’

खड्काले कांग्रेसभित्रको विवाद समाधानका लागि आफूहरू अझै पनि एकताको पक्षमा रहेको दाबी गरे। विशेष महाधिवेशनको माग उठेदेखि नै आफूहरूले पार्टी विभाजन रोक्न विभिन्न चरणमा सहमतिको प्रयास गरेको उनले बताए।

उनका अनुसार गगन थापा र विश्वप्रकाश शर्मासँग पटक–पटक सहमति भए पनि ती सहमति कार्यान्वयन नभएको गुनासो छ।

खड्काले थापा र शर्माले आफूहरूलाई दुई पटक धोका दिएको आरोपसमेत लगाए। पहिलोपटक विशेष महाधिवेशन नगर्ने सहमतिमा १५औँ महाधिवेशनको कार्यतालिका ल्याइएको उनले बताए।

उनका अनुसार आमनिर्वाचन फागुनमा भए वैशाखमा पार्टी महाधिवेशन गर्ने र निर्वाचन सरेमा फागुनमै महाधिवेशन गर्ने समझदारी भएको थियो। तर उक्त सहमतिविपरीत विशेष महाधिवेशन आयोजना गरिएको खड्काको दाबी छ।

‘तीन महिनासम्म सहमतिको प्रयास भयो’

खड्काले गत वैशाखमा पनि थापा स्वयं सहमतिको प्रस्ताव लिएर आएको बताए। त्यसपछि पछिल्लो तीन महिनामा लगातार वार्ता भएको र विशेष महाधिवेशनबाट आएको समिति तथा शेरबहादुर देउवा नेतृत्वको समितिलाई समेटेर अघि बढ्ने समझदारी बनेको उनको दाबी छ।

तर, अहिले आएर उक्त सहमति पनि तोडिएको खड्काले बताए।

“मलाई आएर गगन थापाजीले भन्न सक्नु भएको छैन, तर डा. शेखर कोइरालासँग खड्का दाइसँग भएको सहमति कार्यान्वयन गर्न नसक्ने बताएका छन्,” उनले भने।

खड्काले थापा पक्ष पार्टी एकताको पक्षमा नरहेको आरोपसमेत लगाए। उनका अनुसार विशेष महाधिवेशनबाट गठन भएको समितिलाई समायोजन नगरेसम्म कांग्रेसभित्रको आधिकारिकता विवाद समाधान हुन सक्दैन।

“विशेष महाधिवेशनको समिति नमिलाउँदासम्म विवाद यथावत रहन्छ,” खड्काले भने, “तीन महिना गयो, नाटक मञ्चन भइरहेको छ सानेपामा।”

कांग्रेसभित्र विशेष महाधिवेशनपछि नेतृत्वको वैधानिकता र पार्टी संरचनालाई लिएर विवाद चर्किरहेका बेला खड्काको यस्तो अभिव्यक्तिले संस्थापनइतर समूह र गगन थापा नेतृत्वको पक्षबीचको दूरी अझै कायम रहेको देखाएको छ।

Originally published on abcnews.com.np.