काठमाडौं । संघीय संसद सचिवालयको आयोजनामा निर्माणाधीन नयाँ संसद भवन परिसरमा ‘एक सांसद, एक वृक्षारोपण’ कार्यक्रम सम्पन्न भएको छ।

कार्यक्रमको शुभारम्भ सभामुख डोलप्रसाद अर्यालले एभोकाडोको बिरुवा रोपेर गरेका थिए। कार्यक्रममा राष्ट्रियसभा अध्यक्ष नारायणप्रसाद दाहाल, राष्ट्रियसभा उपाध्यक्ष लीलाकुमारी भण्डारीसहित प्रतिनिधिसभा र राष्ट्रियसभाका सांसदहरूको सहभागिता थियो।

संसद भवन परिसरलाई प्राकृतिक रूपमा सुन्दर, हराभरा र आकर्षक बनाउने उद्देश्यले कार्यक्रम आयोजना गरिएको सभामुख अर्यालले बताए। उनले सांसदहरूले आफूले रोपेको बिरुवाको संरक्षण तथा हेरचाह आफ्नो कार्यकालभरि निरन्तर गर्नुपर्नेमा जोड दिए।

करिब ५०० बिरुवा रोपिए

नयाँ संसद भवन निर्माण परियोजनाअन्तर्गत बगैँचा व्यवस्थापनका लागि विभिन्न प्रजातिका बिरुवा रोप्ने तथा तिनको स्थान निर्धारण गर्ने योजना यसअघि नै बनाइएको थियो।

कार्यक्रममा प्रतिनिधिसभा र राष्ट्रियसभाका सांसदहरूले करिब ५०० वटा बिरुवा रोपेको सभामुखको सचिवालयले जनाएको छ।

फलफूलदेखि औषधिजन्य बिरुवासम्म

संसद भवन परिसरमा एभोकाडो, आरु, आरुबखडा, आँप, लिची, अम्बा, नासपाती, कपुर, बेलपत्र, बुद्धचित्त, रुद्राक्ष, तेजपात, ज्यामिरकाँड, हलुवाबेद, निम, पैयुँ, समी र गुलमोहरलगायतका फलफूल, औषधिजन्य तथा सौन्दर्यमूलक प्रजातिका बिरुवा रोपिएका छन्।

विभिन्न प्रजातिका बिरुवाको संरक्षण र उचित व्यवस्थापनमार्फत नयाँ संसद भवन परिसरलाई हराभरा तथा आकर्षक बनाउने लक्ष्य राखिएको छ।

Originally published on abcnews.com.np.