पोखरा । अविरल वर्षापछि आएको बाढीले कास्कीको अन्नपूर्ण गाउँपालिकामा थप क्षति पुर्‍याएको छ। बाढीका कारण जलविद्युत आयोजना, झोलुंगे पुल तथा घरमा क्षति पुगेको प्रहरीले जनाएको छ।

प्रहरीका अनुसार अन्नपूर्ण–११ छोम्रोङफेदीस्थित घान्द्रुक जलविद्युत आयोजनामा छोम्रोङखोलामा आएको बाढीले कामदार बस्ने कोठा, शौचालय, भान्साघर तथा आयोजनाका विभिन्न सामग्रीमा क्षति पुर्‍याएको छ। आयोजनाको निर्माणमा खटिएको कान्छी बराह कन्स्ट्रक्सन एन्ड सप्लायर्स प्रालिको मातहतमा रहेको कोमात्सु हाइड्रोलिंक एक्साभेटरसमेत बाढीले पुरेको प्रहरीले जनाएको छ।

यस्तै, अन्नपूर्ण–१० स्याउलीबजारमा वडा नम्बर ७ र हवाली जोड्ने झोलुंगे पुल मोदीखोलाको बाढीले बगाएको छ। बाढी स्थानीय मनप्रसाद गुरुङको ढुंगा–माटोले बनेको दुईतले कच्ची घरमा समेत पसेको छ। उक्त घरमा सञ्चालित स्याउलीबजार गेस्ट हाउसका भौतिक संरचना तथा होटलका सामग्री बाढीले बगाएको प्रहरीले जनाएको छ।

उक्त घरमा तीन जना बस्दै आएका थिए। बाढीका कारण घर पूर्ण रूपमा जोखिममा परेको प्रहरीले जनाएको छ।

घान्द्रुक जाने बाटो अवरुद्ध

बिहीबार रातिदेखि परेको अविरल वर्षाका कारण मोदीलगायत खोलामा आएको बाढीले घान्द्रुक जाने सडक कम्तीमा पाँच स्थानमा अवरुद्ध भएको छ।

यसैगरी, नयाँपुलको हाइजुङस्थित माता अन्नपूर्ण मन्दिरतर्फ जाने दुईवटा फलामे पुलसमेत बाढीले बगाएको थियो। मन्दिरमा रहेका पुजारीसहित तीन जनालाई सुरक्षाकर्मीले सकुशल उद्धार गरेका छन्।

बाढीबाट क्षति भएको जानकारी प्राप्त हुनासाथ प्रहरी चौकी घान्द्रुकका प्रहरी नायब निरीक्षक राजेन्द्र पौडेलको कमान्डमा चार जनाको टोली घटनास्थलमा खटिएको थियो।

कास्की प्रहरीले बाढीबाट भएको थप क्षतिको विवरण संकलन तथा सार्वजनिक गर्ने कार्य भइरहेको जनाएको छ।

Originally published on abcnews.com.np.