पोखरा । पोखरा महानगरपालिका नगर युवा परिषद्को आयोजनामा विविध कार्यक्रम गरी २७ औँ अन्तर्राष्ट्रिय युवा दिवस मनाइएको छ। यस वर्षको अन्तर्राष्ट्रिय युवा दिवसको नारा ‘विभिन्न सन्दर्भ, साझा आकांक्षा’ रहेको छ।

संयुक्त राष्ट्रसंघका अनुसार यस नाराले विश्वभरका युवाका फरक–फरक परिस्थिति भए पनि शिक्षा, रोजगारी, स्वास्थ्य, निर्णय प्रक्रियामा सहभागिता तथा उज्ज्वल भविष्य निर्माणजस्ता साझा आकांक्षालाई जोड दिएको छ।

कार्यक्रमलाई सम्बोधन गर्दै पोखरा महानगरपालिकाका प्रमुख धनराज आचार्यले युवालाई नयाँ अवसर प्रदान गर्दै उद्यमशीलता र नेतृत्व क्षमताको विकासमार्फत सशक्त बनाउन महानगरपालिका प्रतिबद्ध रहेको बताए। उनले युवाको क्षमता, सिर्जनशीलता र ऊर्जालाई उत्पादनशील क्षेत्रमा परिचालन गर्न स्थानीय सरकारले आवश्यक वातावरण निर्माण गर्नुपर्नेमा जोड दिए।

नगर युवा परिषद्का कार्यकारी उपाध्यक्ष सन्तोष न्यौपानेले युवालाई लक्षित गरी विभिन्न कार्यक्रम सञ्चालन गर्दै आएको बताए। युवाको क्षमता विकास, उद्यमशीलता प्रवर्द्धन तथा नेतृत्व विकासलाई प्राथमिकतामा राखेर परिषद्ले गतिविधि अघि बढाइरहेको उनको भनाइ छ।

दिवसका अवसरमा युवा सहभागिता, क्षमता विकास तथा सिर्जनशीलतामा केन्द्रित विभिन्न कार्यक्रम आयोजना गरिएको परिषद्ले जनाएको छ।

युवा दिवसको महत्व

संयुक्त राष्ट्रसंघले हरेक वर्ष १२ अगस्टमा अन्तर्राष्ट्रिय युवा दिवस मनाउँदै आएको छ। युवाका समस्या, चुनौती र योगदानलाई उजागर गर्नुका साथै उनीहरूको विकासका लागि आवश्यक नीति निर्माणमा विश्वको ध्यान केन्द्रित गराउनु दिवसको मुख्य उद्देश्य हो।

युवाको क्षमता र ऊर्जालाई देशको सामाजिक तथा आर्थिक विकासमा परिचालन गर्ने वातावरण निर्माणका लागि सरकार, निजी क्षेत्र तथा नागरिक समाजबीच सहकार्य आवश्यक रहेको सरोकारवालाले जोड दिएका छन्।

Originally published on abcnews.com.np.